Në Serbi janë hapur që prej orëve të para të së dielës qendrat e votimit për zgjedhjet parlamentare, presidenciale dhe lokale, shkruan Euronews.
Partia Progresive e Serbisë, e presidentit Vuçiq, pritet të fitojë, sipas sondazheve, por ka pak gjasa të sigurojë një mazhorancë dërrmuese prej 188 vendesh nga 250 që ka Parlamenti serb.
Një sondazh i fundit i kompanisë “Faktor Plus”, i publikuar në të përditshmen “Blic”, e nxirrte partinë e Vuçiq fituese me 53% të elektoratit.
Ndërkohë që vet presidenti, që e hodhi votën në kuti në orët e para të së dielës, pret që të sigurojë një mandat tjetër 5-vjeçar.
“Sa i takon pritshmërive të mia, besoj në një fitore domethënëse dhe bindëse. Gjithashtu besoj se kushdo do të marrë atë që meriton, në përputhje me atë që kemi bërë dhe natyrisht në përputhje me atë që njerëzit presin për të ardhmen. Dhe në të ardhmen do të jetë kritike ruajtja e paqes, stabilitetit dhe progresi ekonomik”, u shpreh Vuçiq.
Grupimi i partive të ndryshme të opozitës, i quajtur Aleanca për Fitoren, pritet të dalë i dyti me 13.7 për qind të votave, ndërsa partneri i Vuçiç, Partia Socialiste e Ivica Daçiç e treta me 10.2 për qind të elektoratit.
Një ultranacionalist në vitet ’90, kur Serbia ndërmori spastrimet etnike në Bosnje, Kroaci dhe Kosovë, Vuçiç u bë politikan pro-evropian në vitin 2008.
Por kritikët thonë se popullariteti i tij vjen si pasojë e stilit autokrat të udhëheqjes, që përfshin kontrollin e rreptë të mediave dhe punësimin në institucionet shtetërore vetëm të mbështetësve të tij.
Nisur nga kjo, opozita serbe ka deklaruar disa herë se zgjedhjet do të jenë të manipuluara dhe se persona fiktivë u janë shtuar listave zgjedhore.
