Ku gjenden në kornizën negociuese negociatat për energjinë elektrike në Sllupçan, rasti me Soravia apo Audinë e Grubit? Pyetje të tilla arritën nga opozitarja VMRO-DPMNE pasi dje shefi i diplomacisë Bujar Osmani me shkumës në dorë dhe në dërrasë të zezë shpjegoi kornizën europiane.
“Në cilin klaster të BE-së janë negociatat e Qeverisë me Sllupçanin për pagesën e energjisë elektrike? Ku në kornizën europiane është fryma ndërmarrëse e Drin Ahmetit, pa një denarë që ta marrë QT Soravia? Në cilin klaster për BE është zgjedhja e Abazit në prokurori, gruaja e tij në AK, përderisa Aliu i qëndron në kokë? Ku janë në kornizën europaine hoteli në Kodrën e Diellit, shitorja në Shkup dhe Audia luksoze e Grubit”, tha Naum Stoillkovski, zëdhënës i VMRO-DPMNE-së.
Reaguan nga Kabineti i ministrit të punëve të jashtme, nga ku thonë se deklaratat e tilla të VMRO-DPMNE-së janë për shkak se partia opozitare nuk mund të pranojë që gënjeshtrat dhe propaganda e tyre kanë dalë në shesh me videon në të cilën shpjegohej korniza e negociatave.
“Qytetarëve iu bë e qartë se as Marrëveshja me Bullgarinë dhe as rishikimet nga Neni 12 nuk do të jenë pengesë për përparimin në integrimin evropian, pasi që ato nuk janë as pjesë e kapitujve, e as e dispozitave që përfshihen në planet aksionare e as diku tjetër në pjesën e posaçme të kornizës negociuese, për të cilën do të përpilohen raporte e mbi të cilat do të ketë votim. Është për të ardhur keq që opozita, në vend që të paraqesë argumentet e saj dhe të shpjegojë publikisht qëndrimet e saja politike, zgjedh të përfshihet në tregime të sajuara me të cilat përpiqet të shmangë përgjegjësinë për inatin politik me të cilin vepron”, u shprehën nga MPJ.
Shefi i diplomacisë, Bujar Osmani, dje publikoi një video ku shpjegoi thelbin e kornizës së negociatave me Bashkimin Europian. Ai theksoi se Marrëveshja me Bullgarinë nuk ka të bëjë me Kornizën negociuese por se është e mundur që Maqedonia të ketë pengesë nga pala bullgare në pjesën e veçantë ku janë 35 kapitujt dhe ku, gjatë votimit nga vendet anëtare, Bullgaria mund të na bllokojë për Planin e Veprimit për pakicat.
