Me shpërbërjen e Kryesisë Qendrore të BESËS, mbrëmë filloi zyrtarisht bashkimi i koalicionit VLEN në një parti.
Kryetarë do të jenë dy: udhëheqësit e Besës dhe Lëvizjes Demokratike – Bilall Kasami dhe Izet Mexhiti.
Një zyrtar i lartë nga VLEN-i i tha “Slloboden Peçatit” se Mexhiti dhe Kasami kanë shtrënguar duart për bashkëkryetarë, dmth partia e ardhshme të ketë dy liderë dhe pjesëmarrje të barabartë në organet e partisë. Mexhiti dhe Kasami do ta paraqesin këtë ofertë para liderit të Alternativës, Bekim Sali, para fraksionit të Aleancës për Shqiptarët, i udhëhequr nga Arben Fetai, si dhe para deputetit të pavarur Bekim Qoku. Nëse oferta refuzohet, Saliu, Fetai dhe Qoku do të jenë në gjendje të vazhdojnë së bashku, por si partnerë koalicioni të partisë VLEN që drejtohet nga Mexhiti dhe Kasami.
Pritjet janë që subjekti i ri politik VLEN të zyrtarizohet muajin tjetër, pas muajit të Ramazanit.
Sipas zyrtarit që na informoi, BESA dhe Lëvizja Demokratike do të marrin pjesë secila në strukturat drejtuese dhe organet partiake të partisë VLEN me nga 35 për qind, dhe pjesëmarrja prej 30 për qind do të duhet të ndahet midis Alternativës, fraksionit AA dhe Qokut nga Vetëvendosja.
Ndarja në përqindje prej 35 për qind për Kasamin dhe Mexhitin dhe 30 përqind për pjesën tjetër do të vlejë edhe për rindërtimin e kësaj Qeverie ose pjesëmarrjen e mundshme të VLEN-it në një qeveri të ardhshme. Zyrtari gjithashtu informon se oferta është e drejtë, sepse BESA dhe Lëvizja Demokratike kanë anëtarësinë më të madhe, strukturën më të zhvilluar të partisë dhe se ato janë më përgjegjëse për fitoret në zgjedhjet parlamentare dhe lokale të koalicionit VLEN në kampin politik shqiptar. (Slloboden Peçat)
