Varka dhe anije me avari, në vend që të jenë në mbeturina, me vite qëndrojnë në kanalin Studençishtë në Ohër, i cili është i lidhur në mënyrë natyrore me Liqenin e Ohrit. Në mesin e 10 objekteve lundruese janë “Sileksi”, si dhe anija Ilinden, në të cilën humbën jetën 15 turistë bullgarë dhjetë vjet më parë. Nga Ndërmarrja Publike, Biljanini Izvori, e cila ekonomizon me një pjesë të kanalit, thonë se ata vazhdimisht u bëjnë thirrje autoriteteve që të largonin objektet e tilla, në mënyrë që të shmangnin një avari më të madhe.
“Më së miri e dinë në Kapedani, sepse të gjithë janë regjistruar tashmë dhe i dinë pronarët. Nëse ato kanë defekte duhet të tërhiqen nga këtu”, deklaroi Gordana Jovanoska – Drejtore e NP “Biljanini Izvori”.
Nga këto anije shpesh rrjedhin mbetjet e naftës dhe vajit, që ende gjenden në rezervuare. Kjo ka ndikim negativ në botën e gjallë në kanal, veçanërisht në peshkun Cironkë, për të cilin ky vend është një vend- shumim natyror. Nga kapedania e Ohrit premtojnë se do të fillojnë t’i heqin ato.
“Do të merren masa për zhvendosjen e atyre, që nuk janë të regjistruar dhe në të cilët inspektorët do të përcaktojnë pasoja të mundshme të derdhjes së naftës …”, tha Goran Ustijanoski- kapedan i Kapedanisë së porteve.
Por, ky nuk është problemi i vetëm në kanal. Situata ekologjike është komplikuar edhe më tej, nga fakti se numri i objekteve lundruese në Liqenin e Ohrit, të cilat janë parkuar këtu, është vazhdimisht në rritje.