“Gripi po lehtësohet, por jo mjaftueshëm për t’u çliruar plotësisht”. Kështu deklaroi sot drejtoresha e Institutit të Shëndetit Publik Marija Andonovska, e cila theksoi se në Maqedoninë e Veriut ende ka grip dhe sëmundje të ngjashme me gripin, por numrat po fillojnë që të bien. Siç thotë ajo më të prekurit janë personat e moshës 15 deri në 64 vjeç, por shkalla më e lartë e sëmundshmërisë regjistrohet përsëri tek fëmijët nën 4 vjeç.
Marija Andonovska, drejtoreshë e institutit të shëndetit publik
“Në periudhën nga 19 deri në 25 janar, pra në javën e katërt të vitit 2026, u raportuan 1,708 raste, që është 17% më pak se java e kaluar kur kishte 2,062 raste. Pavarësisht rënies, aktiviteti i virusit është ende mbi kufirin e konsideruar mesatar. Më të prekurit janë personat e moshës 15 deri në 64 vjeç – 1,029 raste, por shkalla më e lartë e sëmundshmërisë regjistrohet përsëri tek fëmijët nën 4 vjeç. Më shumë raste u raportuan në Shkup (526), Strumicë (178), Ohër (113), Prilep (111) dhe Kumanovë (102)”.
Siç njoftoi Andonovska, aktivitet shumë i lartë i gripit është regjistruar në Dibër dhe Kratovë, ndërsa aktivitet i lartë vërehet edhe në Ohër, Kavadar dhe Strumicë. Në disa qytete, ajo tha se aktiviteti është sezonal ose mesatar, dhe në dy zona regjistrohet aktivitet shumë i ulët.
Ndërkaq ajo tha se analizat laboratorike tregojnë se viruset e gripit A qarkullojnë më shpesh, dhe përveç gripit, janë zbuluar edhe raste të RSV, një virus që prek më shpesh fëmijët. Dhe për më tepër ajo tha se javën e kaluar, nuk u regjistrua asnjë rast pozitiv i COVID-19.
