Sulmet me dronë rusë ndaj objekteve të energjisë në Ukrainën veriore dhe jugore gjatë natës lanë gati 60,000 klientë pa energji elektrike, me presidentin Volodymyr Zelensky që u zotua të hakmerrej duke urdhëruar më shumë sulme thellë brenda Rusisë.
Tre vjet e gjysmë pas fillimit të luftës, Rusia dhe Ukraina kanë intensifikuar sulmet ajrore në javët e fundit. Rusia ka synuar sistemet e energjisë dhe transportit të Ukrainës, ndërsa Ukraina ka sulmuar rafineritë dhe tubacionet ruse të naftës.
“Ne do të vazhdojmë operacionet tona aktive në mënyrën e duhur për mbrojtjen e Ukrainës. Forcat dhe burimet janë përgatitur. Janë planifikuar gjithashtu sulme të reja të thella”, tha Zelenskiy në X pasi u takua me gjeneralin e lartë të Ukrainës, Oleksandr Syrsky, pa dhënë detaje të mëtejshme mbi planet.
Kompania më e madhe private e energjisë në Ukrainë, “DTEK”, tha se dronët rusë kishin sulmuar katër objekte energjetike në rajonin e Odesës gjatë natës, dhe autoritetet lokale raportuan se 29,000 njerëz mbetën pa energji elektrike herët të dielën.
Më i godituri më rëndë ishte qyteti Chornomorsk, pak jashtë Odesës, ku u dëmtuan gjithashtu shtëpi dhe ndërtesa administrative, tha Oleh Kiper, guvernatori i rajonit më të gjerë të Odesës, shkruan Reuters, transmeton Klankosova.tv
