Presidenti amerikan, Donald Trump, ka thënë të hënën se do ta vendosë Gardën Kombëtare në Uashington DC ndërsa policinë e kryeqytetit nën kontroll federal.
Njoftimi i tij ka ardhur gjatë një konference për media të hënën, gjatë të cilës ka folur për goditje ndaj krimit dhe mungesës së strehimit në kryeqytetin e vendit.
Trumpi ka thënë se do t’u japë njerëzve të pastrehë një vend për të qëndruar larg kryeqytetit.
“Do ta kthejmë përsëri kryeqytetin tonë”, ka thënë Trumpi.
Për Trumpin, pamja e jashtme mund të jetë po aq e rëndësishme sa statistikat kur bëhet fjalë për krimin dhe mungesën e strehimit në kryeqytetin e SHBA-së.
Trumpi sugjeron se shkalla e vrasjeve në Uashington DC është më e lartë se disa “nga vendet më të këqija në Tokë” dhe thotë se numri i vjedhjeve dhe grabitjeve të veturave është rritur gjithashtu.
Ai ka thënë se Uashington DC është “pushtuar nga bandat e dhunshme dhe kriminelët e etur për gjak”, si dhe nga “maniakë të droguar dhe njerëz të pastrehë”.
Kryebashkiakja e Uashington DC, Muriel Boëser, ka hedhur poshtë pretendimet e Trumpit se kryeqyteti po përjeton një valë krimi.
