Trump: Marrëveshja fillestare tregtare me Kinën do të nënshkruhet muajin tjetër

Presidenti i SHBA-së, Donald Trump, deklaroi se do të nënshkruajë fazën fillestare të marrëveshjes tregtare me Kinën muajin tjetër, rast ky që mund të jetë një moment historik i një lufte dypalëshe tregtare.

Ceremonia e 15 janarit në Shtëpinë e Bardhë do të përfshijë zyrtarë të lartë kinezë, tha presidenti në Twitter. Ai nuk specifikoi kush do të përfaqësojë Kinën, duke përmendur vetëm se do të jenë “përfaqësues të nivelit të lartë”.

“Në një datë të mëvonshme do të shkoj në Pekin, ku do të fillojnë bisedimet e fazës së dytë,” tha Trump.

Lufta e vazhdueshme tregtare midis dy ekonomive kryesore të botës ka përçuar valë tronditëse nëpër tregjet ndërkombëtare me frikën se mund të shkaktojë një rënie ekonomike në gjithë botën.