Kryetari i Aleancës për Shqiptarët, Arben Taravari, tha se sot nga drejtori drejtori i Inspektoratit të Arsimit, Halit Ferati, është informuar se përfundimisht është zgjidhur problemi me nxënësit shqiptarë në Gjimnazin e Velesit përmes themelimit të dy paraleleve me mësim në gjuhën shqipe.
Megjithatë, Taravari tha se nëse kjo zgjidhje nuk respektohet dhe paralelet nuk do të jenë funksionale, si partner i koalicionit qeveritar, do të insistojë që MASH-i t’ia merr kompetencat e arsimit komunës së Velesit, shkruan gazeta LAJM.
“Dje u informova se këshilli komunal në Veles nuk ka lejuar që të mbahet mësimi në gjuhën shqipe. Sot e pash drejtorin e inspektoratit të arsimit që atje definitivisht kanë vendosur që të hapet klasa në gjuhën shqipe. Kjo më bën krenar si kryetar i ASH-së për veprimin dhe iniciativën që e ka marrë ky drejtor sepse edhe ai vije prej atij rrethi, është me prejardhje prej Çashke dhe ai dëshiron më së shumti që të zgjidhet ky problem”, tha Taravari.
A do të kërkojë ASH-ja t’i merren kompetencat e arsimit kryetarit të komunës së Velesit?
“Nëse realizohet, nuk ka nevojë, ne e kemi kryer obligimin, nëse nuk realizohet patjetër se do të insistojmë që t’i merren kompetencat kryetarit të komunës së Velesit”, tha Taravari për gazetën LAJM.
Me vendim të Inspektoratit Shtetëror të Arsimit, nxënësit shqiptarë të Velesit që kanë arritur të grumbullojmë 50 pikë për regjistrim në shkollë të mesme, do të pranohen në gjimnazin “Koço Racin”, ndërsa të tjerët nën 50 pikë do të regjistrohen në Shkollën e Mesme Ekonomike.
Pavarësisht kësaj, prindërit dhe nxënësit të cilët sot kanë protestuar, mbeten në qëndrimin që në këtë shkollë të mesme të pranohen të gjithë nxënësit që kanë konkurruar pavarësisht pikëve që kanë./Gazeta LAJM
