Kryetari i Alencës për Shqiptarët (ASH), Arben Taravari, në një intervistë për gazetën LAJM, tha se partia që drejton ai është subjekti më kritik ndaj Bashkimit Demokratik për Integrim (BDI). Ndonëse prej disa muajsh ASH-ja është partner i koalicionit qeveritar me BDI-në, Taravari këmbëngul se kritikat ndaj partisë së Ahmetit nuk kanë pushuar asnjëherë.
“Ne kemi qenë partia më kritike ndaj BDI-së, jo që vetëm kemi qenë, por vazhdojmë edhe të jemi. Unë gëzohem që sot disa analistë, por edhe përfaqësues politik, i përsërisin tezat dhe qëndrimet tona që i kemi thënë para 3,4,5,6 apo 7 viteve prej se jemi krijuar si parti. ASH-ja është krijuar si antipod i BDI-së dhe njëra prej arsyeve kryesore që jemi kyçur në politikë ka qenë arsyeja për ta ndryshuar BDI-në dhe vazhdojmë të mendojmë kështu, por vetëm duhet të shikojmë se në çfarë mënyre dhe si do të bëhet kjo. Uroj dhe shpresoj që ASH-ja do të jetë partia që do ta zëvendësojë BDI-në, sepse ka edhe kapacitete, edhe resurse njerëzore për ta bërë këtë ndryshim”, tha Taravari.
Sa i përket thirrjeve të vazhdueshme që partitë opozitare i’a drejtojnë ASH-së për ta braktisur qeverinë dhe për t’u bërë pjesë e “frontit opozitar”, me qëllim për ta rrëzuar BDI-në nga pushteti, Taravari tha se organet partiake do të vendosin, si do të garojë subjekti i tij në zgjedhje.
“Unë shpesh e kam thënë që ASH-ja është parti autonome dhe të gjitha vendimet i sjell në organet partiake, në bazë të analizave të cilat i bëjmë në kuadër të partisë. Ne e kemi thënë qartë që, nuk e përjashtojmë bashkëpunimin me asnjë subjekt politik, por për momentin qëndrimi ynë është që duhet të përgatitemi sikur shkojmë vetë në zgjedhje. Kjo porosi është dërguar te të gjithë anëtarët e ASH-së, për të gjithë degët dhe në kryesi qendrore e kemi debatuar si temë, por do të shohim si do të shkojnë zhvillimet dhe më tutje do të vendosim se si do të shkojë në zgjedhje ASH-ja si subjekt. Por, definitivisht vendimet do ti sjellim në kuadër të organeve partiake”,
Taravari foli edhe për qendrimet e ndryshme brenda ASH-së lidhur me koalicionet eventuale parazgjedhore.
“Jo që nuk bisedohet kjo temë, natyrisht kjo është temë e cila hapet në organet partiake. Ka njerëz të cilët mendojnë që ASH-ja duhet të shkojë vetë në zgjedhje, ka njerëz të cilët mendojnë që duhet të shkojë me BDI-në, ka anëtarësi që mendon se duhet të jemi opozitë. Ka mendime të ndryshme, por në fund në bazë të analizave që do ti bëjmë, sidomos nga tereni , nga anketat, përveç të tjerave ne duhet të mendojmë edhe interesin e ASH-së, besoj që organet e ASH-së do ta sjellin vendimin më korrekt dhe më të mirë të mundshëm për partinë tonë”, tha Taravari për gazetën LAJM.
Ditë më parë, kreu i Lëvizjes Demokratike, Izet Mexhiti, i ka bërë thirrje të drejtpërdrejt drejtuesit të ASH-së, Arben Taravari që ta braktisë qeverinë dhe t’i bashkohet opozitës shqiptare.
