Ambasadori i Shqipërisë në Shkup, Denion Meidani ka takuar kryetarin e Komunës së Çairit, Izet Mexhiti, me të cilin ka diskutuar për situatën aktuale, bashkëpunimin institucional dhe ritmin e integrimit evropian.
Meidani e falënderoi Mexhitin për angazhimin lidhur me çështjen e provimit të jurisprudencës, si dhe e uroi për shfaqjen e operës “Goca e Kaçanikut” në Shkup dhe për besimin e qytetarëve në drejtimin e komunës.
“Takim miqësor si përherë me Izetin. Bisedë e drejtpërdrejtë për situatën, bashkëpunimin e ritmin e integrimit evropian dhe përgjegjësinë që kemi për ta mbajtur agjendën tonë strategjike të qartë dhe konkrete. E falënderova për angazhimin publik lidhur me çështjen e provimit të jurisprudencës dhe trajtimin e saj në përputhje me kuadrin ligjor. E urova gjithashtu për shfaqjen për herë të parë në Shkup të operës “Goca e Kaçanikut”, në nder të pavarësisë së Kosovës, si dhe për besimin e qytetarëve për drejtimin e Komunës së Çairit.Dialog i hapur, me fokus te puna dhe hapat përpara”, ka shkruar Meidani.
