Me 14 shtator në orën 21:00, Venera Lumani dhe Lind Islami, kanë koncertin e tyre i cili organizohet në Amfiteatrin e Tiranës.
Venera ishte e ftuar në “Good morning Albanians”, ku foli për këngët se do të jenë të gjitha të tyret dhe nuk do të ketë cover-a, shkruan lajmi.net.
Ndër të tjera, ajo sqaroi edhe debatin e para shtatë vitesh me Flori Mumajesin.
Ata patën një “përplasje” në Këngën Magjike dhe ishte Mumajesi ai që rikujtoi situatën përmes një postimi në Instagram duke thënë se tashmë “i kishte dalë fjala e tij”.
“Nuk më duket etike nëse flasim pa qenë të gjithë prezent në tavolinë, por që nuk reagova sepse nuk më pëlqen që artistët të grricen me njëri tjetrin nga Instagrami, nga rrjetet sociale. Mendoj se do të ishte shumë më e drejtë, shumë më e bukur që në një moment që do të jemi të gjithë bashkë ta diskutojmë sepse është diskutim shumë i mirë. Mua asnjëherë nuk më ka joshur vëmendja nga gërricjet në Instagram.
E pyetur nëse ajo vetë ka shkuar drejt rrymës tallava, për të cilën debatoi me Mumajesin, Lumani u përgjigj: “Mendoj se njerëzit e keqkuptojnë, ose nuk e dinë fiks se çfarë do të thotë tallava dhe zhanere të tjera, por kjo duhet shpjeguar nga ne artistët. Kam përshtypjen që ka qenë një periudhë jo e mirë e Florit kur të gjithë e sulmonin për muzikën që ai bënte në atë kohë dhe më duket që si për inerci edhe pyetja ime ka marrë një konotacion të gabuar. Unë s’e kam sulmuar asnjëherë, jam shumë e vogël para Florit, para muzikës së tij dhe kam përshtypjen jam përzier edhe unë aty, por pyetja ime ka qenë shumë naive dhe si të thuash për të kërkuar një lloj këshille dhe mendoj që është gabuar, me siguri, edhe për shkak të artikulimit të gabuar sepse ka qenë dukshëm naiviteti i një artisti shumë të ri”./Lajmi.net/
