Enzo Maresca beson se mungesa e Cole Palmer për shkak të dëmtimit është e barabartë me atë që do të përballeshin Manchester City dhe Liverpool nëse do t’u mungonin yjet e tyre, Erling Haaland dhe Mohamed Salah.
Chelsea nuk ka mundur të llogarisë te lojtari i tyre kryesor që nga shtatori dhe rikthimi i tij nga dëmtimi është shtyrë sërish pas një incidenti të çuditshëm në shtëpi.
Chelsea është detyruar të vazhdojë pa Palmerin pasi ai pësoi një dëmtim në ije në humbjen 2-1 ndaj Manchester United më 20 shtator.
Reprezentuesi anglez pritej të rifillonte stërvitjen me ekipin e parë këtë javë, por rikthimi i tij i shumëpritur është shtyrë për edhe shtatë ditë të tjera pasi ai theu gishtin e këmbës duke u përplasur me një derë.
Si pasojë, Palmer do të humbasë tre ndeshjet e ardhshme të Chelseat, udhëtimin e së shtunës te Burnley në Ligën Premier, ndeshjen në shtëpi të së martës kundër Barcelonës në Ligën e Kampionëve dhe takimin e fundjavës së ardhshme në ligë kundër kryesuesve të Arsenalit.
Cole Palmer
“Ai (Palmer) ndoshta nuk do të jetë i gatshëm për të shtunën, për Barcelonën dhe as për Arsenalin”, tha Maresca fillimisht.
“Për fat të keq, ai pati një aksident në shtëpi ku goditi gishtin e këmbës. Nuk është asgjë serioze, por nuk do të rikthehet javën e ardhshme”.
“Për ne, Cole është si Haaland për Manchester City, si Salah për Liverpool. Nëse Haaland nuk luan për Cityn ose Salah nuk luan për Liverpoolin, ata nuk janë e njëjta skuadër”.
“Kështu që jam shumë krenar, veçanërisht krenar për lojtarët, sepse ky është një moment i vështirë pa Cole”, përfundoi italiani.
