Shqipëria renditet e para në rajon dhe e pesta në Evropën Lindore dhe Azinë Qendrore për numrin e infeksioneve me COVID-19 midis janarit 2020 dhe shtatorit 2021, sipas një studimi të botuar nga revista mjekësore, The Lancet.
Sipas EurActiv, studimi, i cili shqyrtoi infeksionet dhe vdekjet nga COVID-19 në 177 vende, zbuloi se shkalla e infeksioneve për 1,000 banorë në Shqipëri është 870.
Raporti shton se shkalla mesatare e infeksionit në vendet e marra në shqyrtim është 433 për 1,000 banorë, me Afganistanin që shënonte shifrën më të lartë me 988.
Maqedonia e Veriut renditet poshtë Shqipërisë, me një shkallë infeksioni prej 838 për 1,000 banorë.
Ndërsa, Bosnja dhe Hercegovina dhe Serbia kishin shkallë të infeksionit përkatësisht 717 dhe 552 për 1,000 banorë.
Raportit i mungojnë të dhënat për Kosovën.
Megjithatë, Shqipëria renditet më mirë për sa i përket raportit të saj të infektimit ndaj vdekshmërisë.
Vendi ka një normë vdekshmërie prej 4.49 për 1000 banorë krahasuar me 5.43 të Bosnjës dhe Hercegovinës dhe 6.52 të Maqedonisë së Veriut. Megjithatë, mesatarja globale është 3.4.
Së fundmi, Ministrja e Shëndetësisë Ogerta Manastirliu është shprehur se është shumë herët për të shpallur fitoren ndaj pandemisë COVID-19 pasi rastet kanë qenë vazhdimisht të larta që nga zbulimi i variantit të ri Omicron në dhjetor.
Sipas Manastirliut, 56% e banorëve janë vaksinuar plotësisht dhe masat kanë mbetur kryesisht të njëjta gjatë vitit të kaluar pavarësisht luhatjeve në shkallën e infeksionit.
