Kryetari i partisë malazeze „Mali i Zi i Lirë“, Vladislav Dajković, pretendon se është dënuar nga një gjykatë shqiptare për shkak të një fotografie të publikuar gjashtë vjet më parë në Shkodër, ku shfaqej me flamurin trengjyrësh malazez dhe me mbishkrimin provokues: „Përshëndetje të gjithëve nga Shkodra e lashtë serbe“, raporton RTCG.
Sipas deklaratës së tij, fillimisht ishte dënuar me tre vjet burg, por dënimi për veprat penale të nxitjes së urrejtjes dhe përçarjes kombëtare është ulur në një vit burg, për shkak të rrethanave familjare dhe mungesës së precedentëve penalë.
Dajkoviqi e cilëson procesin si të motivuar politikisht dhe pretendon se nuk ka fyer apo kërcënuar askënd, por vetëm ka shprehur ato që ai i quan fakte historike. Madje, pretendimin se Shkodra kishte qenë për shekuj kryeqytet i Perandorisë Serbe, ai e paraqet si „fakt historik të njohur“.
Në arsyetimin e vendimit, sipas tij, përmenden edhe të dhëna të shërbimeve shqiptare, të cilat e përshkruajnë si nacionalist serb, përkrahës të ideve të Serbisë së Madhe dhe mik të afërt të mitropolitit Amfilohije.
Ai zbulon se i ishte ofruar mundësia për një dënim me kusht, nëse paraqitej në Shkodër, por thotë se e kishte refuzuar këtë mundësi.
„Nuk më shkon ndërmend të shkoj në Shkodër, sepse jam i sigurt se sapo të kaloja kufirin do të dërgohesha menjëherë në paraburgim dhe nga ai paraburgim do të dilja në arkivol“, ka deklaruar Dajkoviqi.
Ai këmbëngul se nuk ka cenuar sovranitetin dhe integritetin territorial të Shqipërisë dhe as nuk ka kërcënuar qytetarët shqiptarë. Megjithatë, nuk ka shprehur asnjë pendesë për provokimin e tij ndaj Shkodrës dhe shqiptarëve.
„Nëse unë duhet të shkoj në burg për këtë, atëherë duhet të shkojë edhe i gjithë sistemi ynë arsimor. Këto janë standarde të dyfishta. Të kërkoj falje nuk do ta bëj“, ka deklaruar ai.
Dajkoviqi ka paralajmëruar se do ta ankimojë vendimin e shkallës së parë dhe ka përsëritur se nuk do të dorëzohet vullnetarisht te autoritetet shqiptare.
Në vend që të reflektojë për provokimin e tij nacionalist, politikani malazez zgjedh të viktimizohet dhe ta paraqesë drejtësinë shqiptare si instrument të një procesi politik.
Burimi: RTCG. Teksti është ristrukturuar mbi bazën e materialit të dërguar; pretendimet për vendimin gjyqësor dhe motivet e tij i atribuohen Dajkoviqit.
