Mbi 75 për qind e pacientëve me kancer të gjirit analizat e tyre i bëjnë në klinikat private. Kjo përqindje ka dalë nga anketat e bëra nga Shoqata e Pacientëve me Kancer “Hema Onko”, me çka sipas tyre, vendi ka ngecur në shumë sektorë të sistemit shëndetësor, ku diagnostikimi i vonshëm vazhdon të mbetet sfida kryesore e pacientëve. Ndërkaq, pas diagnostikimit, dërgimin e menjëhershëm të pacientëve në kirurgji e konsiderojnë tejet të dëmshme.
“Më shumë se 75 për qind e pacinetëve të diagnostikuar herët analizat e tyre i bëjnë në klinika private. Pse është kjo kështu? Përgjigja është shumë e qartë, shumë gjatë pritet për terminë për biopsi dhe patologji në institucionet shtetërore. Ndërsa, ajo që është më tronditëse për ne si pacientë onkologjikë është se këto 75 për qind të pacientëve që janë të diagnostikuar, pa dallim se në cilin stadium të parë apo të katërtin, ato fillimisht dërgohen në kirurg. Kjo praktikë duhet të hiqet në këtë shtet”, tha Ana Marjanoviq, përfaqësuese e Shoqatës Hema Onko.
Vazhdon të rritet numri i pacientëve të rinj me kancer të gjirit. Këtë vit janë regjistruar mbi 1 mijë pacientë.
“Ne me anketat e tona që i bëjmë shpresojmë të kemi numrin e saktë të diagnostikimit, megjithatë sipas të dhënave që i ka Klinika e Onkologjisë, këtë vit kemi 1200 pacientë të rinj me kacer të gjirit. Që për fat të keq është numër i madh dhe akoma më keq është se nga viti në vit rritet ky numër”, deklaroi Milica Kuzmanovska, përfaqësuese e Hema Onko.
Mungesa e personelit mjekësor në Klinikën e Onkologjisë vazhdon të mbetet problematike për pacientët me çka radhët e gjata të tyre assesi të shkurtohen. Ndërkaq, shpesh herë pacientët me kancer përballen edhe me mungesë të terapive. /Alsat.mk
