Një ndërtesë banimi shtatëkatëshe në qytetin veriperëndimor të Turqisë, Gebze, është shembur të mërkurën herët në mëngjes, duke lënë pesë persona nën rrënoja.
Guvernatori i Gebzes, İlhami Aktas, u ka thënë gazetarëve se është konfirmuar se personat nën rrënoja janë një familje me pesë anëtarë. Ende nuk dihet nëse ka viktima, raporton AP.
Ekipet e Drejtorisë së Menaxhimit të Fatkeqësive dhe Emergjencave, ose AFAD, janë në vendngjarje duke kryer operacione shpëtimi.
Agjencia shtetërore Anadolu raporton se shkaku i shembjes është aktualisht i panjohur.
Kryebashkiaku i Gebzes, Zinnur Büyükgöz, duke folur për mediat lokale, ka sugjeruar se shembja mund të lidhet me një ndërtim metroje që po zhvillohet aty pranë.
Gebze ishte një nga qendrat kryesore të goditura gjatë tërmetit me magnitudë 7.6 të vitit 1999, i cili la të vdekur rreth 18,000 njerëz në total.
