Sekretari i Përgjithshëm i NATO-s, Mark Rutte, refuzoi të përgjigjej ndaj kërcënimeve të presidentit rus, Vladimir Putin, ndaj Evropës.
Para takimit të ministrave të Jashtëm të Aleancës, Rutte u kujtoi gazetarëve se Putini së fundmi u shfaq “me uniformë ushtarake”, por “mjaft larg frontit të luftës”.
Rutte theksoi se ministrat e NATO-s do të diskutojnë si të mbajnë Ukrainën sa më të fortë gjatë luftës së vazhdueshme, si edhe si të sigurojnë që vendi të ketë pozicionin më të mirë të mundshëm kur të fillojnë bisedimet e vërteta për paqe.
Këto deklarata vijnë pas takimit të Putinit në Kremlin me Steve Witkoff dhe Jared Kushner, ku ai akuzoi Evropën për “sabotimin e procesit të paqes”.
Në të njëjtën kohë, Putini bëri deklarata kontradiktore, duke insistuar se “nuk kërkon luftë me Evropën”, ndërsa paralajmëroi “nëse Evropa do të luftojë, ne jemi gati menjëherë”.
Ministrat e Jashtëm të NATO-s po mbajnë takimin e tyre të parë në Bruksel që nga publikimi i një draft-plani paqeje për t’i dhënë fund luftës në Ukrainë, mes shqetësimeve në rritje për aleancën që po lihet mënjanë në bisedimet që kryesisht janë udhëhequr nga zyrtarë amerikanë dhe rusë.
I dërguari i Presidentit të SHBA-ve, Donald Trump, Steve Witkoff, dhe dhëndri i tij Jared Kushner, përfunduan pesë orë bisedime në Moskë me Presidentin Vladimir Putin dhe zyrtarë të lartë rusë.
Pavarësisht se nuk pati ndonjë përparim të dukshëm, një figurë e lartë ruse i përshkroi bisedimet si produktive.
Plani fillestar i paqes me 28 pika, i cili që atëherë është kritikuar gjerësisht si një listë dëshirash ruse, kërkonte një premtim se Ukraina nuk do t’i bashkohej kurrë NATO-s dhe se nuk do të kishte anëtarë të rinj të NATO-s nga Evropa Lindore.
Përpara takimit të parë të ministrave të jashtëm të NATO-s që nga publikimi i draftit, Sekretari i Përgjithshëm i NATO-s, Mark Rutte, këmbënguli se çdo element i një plani të përditësuar paqeje që përfshin NATO-n do të duhet të ketë kontributin e aleancës.
Rutte tha se ndërsa aktualisht nuk kishte konsensus midis anëtarëve të NATO-s për anëtarësimin e Ukrainës në aleancë, politika e dyerve të hapura e NATO-s ende qëndron.
Brenda NATO-s po thellohet pakënaqësia se administrata Trump po vepron më shumë si një arbitër midis Evropës dhe Rusisë, dhe jo si një anëtar i vetë aleancës.
Sekretari i Shtetit i SHBA-ve, Marco Rubio, nuk do të marrë pjesë në takimin e sotëm.
