Pas kontrolleve të rregullta që Ndërmarrja Publike Komunale “Tetova”, po bën për qentë endacakë të sterilizuar në qytet, ka dalë ndrit një ngjarje shqetësuese.
Sipas një reagimi nga drejtori i NPK-së, Samet Bislimi, gjatë një kontrolli është konstatuar se të paktën një qen është sjellë nga Shkupi në Tetovë, gjë që është vërtetuar përmes çipit me numër serik, i cili përmban të gjitha të dhënat e origjinës së kafshës.
Ky zbulim ka ngritur dyshime serioze për një veprim të qëllimshëm, ndërsa drejtori i NPK-së paralajmëron se “po luhet një lojë e rrezikshme me Tetovën dhe me sigurinë e qytetarëve të saj”.
“Komuna e Tetovës bën kontrolle të rregullta të qenve endacakë të sterilizuar, për të mbrojtur qytetarët e saj. Gjatë një kontrolli të rregullt, u konstatua se të paktën një qen është sjellur nga Shkupi në Tetovë. Për këtë dëshmon çipi me numër serik i cili përmban të gjitha të dhënat për qenin”.
“Prandaj, si ndërmarrje publike jemi të detyruar të ngrejmë publikisht këtë shqetësim: Kush po i sjellë qentë nga Shkupi në Tetovë? Për çfarë qëllimi bëhet kjo? Ne do të vazhdojmë të kujdesemi për sigurinë e tetovarëve, por edhe t’i denoncojmë lojërat e pista që bëhen kundër qytetit tonë”, shkruan në reagim, drejtori i NPK-së.
Në opinion janë ngritur pikëpyetje, pasi pushteti në Qytetin e Shkupit aktualisht drejtohet nga Danella Arsovska, me përkrahje të BDI-së dhe Levicës, të cilët tashmë po akuzohen se mund të qëndrojnë pas këtij veprimi të dyshimtë.
Nderkohë, Komuna e Tetovës ka ndërmarrë masa të vazhdueshme për kontrollin dhe menaxhimin e qenve endacakë, për të siguruar mjedis më të sigurt për qytetarët.
