Shoqata për e-tregti e Maqedonisë (AETM) ka publikuar botimin më të fundit dhe të përditësuar të Regjistrit të e-tregtarëve. Kjo bazë të dhënash unike dhe gjithëpërfshirëse synon t’i ndihmojë qytetarët të kontrollojnë shpejt dhe lehtë nga kush po blejnë para se të bëjnë një pagesë online me kartat e tyre, transmeton Portalb.mk.
Baza e re e të dhënave u lejon konsumatorëve të kontrollojnë me një klikim nëse një dyqan i caktuar elektronik është një entitet juridik i regjistruar me pagesë të integruar dhe të sigurt online përmes një banke.
Për qëllimet e këtij përditësimi, AETM përdori gjithashtu mjete të bazuara në inteligjencë artificiale për kontrollin automatik të aktivitetit, disponueshmërisë dhe kategorizimit të dyqaneve elektronike.
Regjistri është një sistem i strukturuar që përditësohet në bashkëpunim me pesë bankat kryesore që përpunojnë transaksione elektronike në vend – Komercijalna Banka, NLB Banka, Stopanska Banka, Halk Banka dhe UNI Banka.
Regjistri përfshin shitësit elektronikë që janë të regjistruar si subjekt juridik në Maqedoni, kanë një sistem të integruar pagesash online dhe kanë përfunduar të paktën një transaksion gjatë vitit 2025.
“Regjistri i shitësve elektronikë na lejon jo vetëm të identifikojmë dyqanet elektronike aktive, por edhe të kemi një pasqyrë më të qartë se kush përbën ofertën në tregun vendas. Analiza tregon se përveç kategorive tradicionalisht të forta, siç janë kozmetika, moda dhe elektronika, po vërejmë një prani në rritje të shërbimeve – arsimit, turizmit dhe produkteve digjitale, që është një tregues i pjekurisë së ekonomisë digkitale dhe zgjerimit të zakoneve të blerjeve online midis konsumatorëve”, thotë Nina Angelovska-Stankov, kryetare e AETM.
Baza e të dhënave e azhurnuar aktualisht përfshin 1,374 dyqane elektronike aktive të shpërndara në 25 kategori. Të dhënat tregojnë se pjesa më e madhe e ofertës së tregtisë elektronike të Maqedonisë përbëhet nga dyqane për kozmetikë, produkte bukurie ose kujdesi – 115, veshje, këpucë dhe aksesorë mode – 100, ushqim dhe pije – 87, pajisje të bardha dhe elektronikë – 86. Ekzistojnë 81 dyqane për turizëm dhe udhëtime, 73 për shërbime digjitale dhe transmetim, 71 për arsim dhe 61 për shtëpi, mobilje dhe kopsht.
AETM thotë se përveç mbrojtjes së blerësve, regjistri luan gjithashtu një rol të rëndësishëm në luftën kundër tregtarëve të paregjistruar dhe ekonomisë së fshehtë, duke e bërë tregun transparent. Për vetë kompanitë që janë në të, regjistri përfaqëson një shenjë shtesë të besueshmërisë, si dhe një mundësi për dukshmëri më të madhe për blerësit potencialë.
Sipas analizës së AETM-së të të dhënave të fundit nga Banka Popullore e Republikës së Maqedonisë, në vitin 2025 vlera totale e transaksioneve online arriti në 950 milionë euro, që është një rritje prej 32 përqind krahasuar me vitin e kaluar. Nga kjo shumë, 522 milionë euro shkuan për shitësit me pakicë elektronikë, dhe numri i pikave aktive të shitjes së tregtisë elektronike u rrit me 84 krahasuar me vitin 2024.
Regjistri është plotësisht publik dhe kërkimi është falas. Qytetarët mund të kërkojnë sipas emrit të kompanisë, kategorisë ose adresës së internetit në: ecommerce.mk/registar.
