Kryeministri i Indisë, Narendra Modi, bëri thirrje për qetësi, derisa protestat e dhunshme kundër një ligji të ri për migrantët e paligjshëm hynë në ditën e pestë. Ligji i ri u jep të drejtën e shtetësisë disa migrantëve jomyslimanë nga tre vende me shumicë myslimane. Njerëzit që protestojnë kanë qëndrime të ndara rreth ligjit. Disa thonë se ai është anti-mysliman, ndërsa të tjerët – sidomos ata në rajonet kufitare – druajnë nga migrimet masive. Autoritetet kanë provuar t’i frenojnë protestat duke ndalur shërbimet e internetit. Përleshjet midis protestuesve dhe policisë lanë të vdekur së paku gjashtë njerëz. Ligji lejon që jomyslimanët nga Bangladeshi, Pakistani dhe Afganistani, të cilët kanë hyrë në Indi në mënyrë të paligjshme, të bëhen shtetas. Sipas qeverisë, ligji synon t’i strehojë ata që kanë ikur nga persekutimi fetar. Kritikët thonë se ligji është pjesë e agjendës së qeverisë për të margjinalizuar myslimanët dhe se shkel parimet laike, të përcaktuara me kushtetutë. Zyra për të Drejtat e Njeriut e Kombeve të Bashkuara tha se ligji i ri është thelbësisht diskriminues në natyrë. Qeveria mohon çdo paragjykim fetar dhe thotë se myslimanët nuk janë të përfshirë në ligjin e ri, sepse nuk janë pakicë fetare dhe nuk kanë nevojë për mbrojtjen e Indisë.
