Planifikuesi ekonomik i Kinës njoftoi se do të ndërmerren politika më të forta për të inkurajuar më tej investimet e huaja mes përpjekjeve të vendit për të zgjeruar hapjen.
Duke u bazuar në politikat aktuale, Kina do të vazhdojë të barazojë fushën e lojës, të qetësojë rrjedhën e faktorëve të inovacionit dhe të promovojë bashkëpunimin pragmatik midis ndërmarrjeve vendase dhe të huaja, deklaroi Yuan Da, zëdhënës i Komisionit Kombëtar të Zhvillimit dhe Reformës, citon “Xinhua”.
Ai vuri në dukje se planifikuesi ekonomik do të konsiderojë shkurtimin e listës negative për investimet e huaja në Portin e Tregtisë së Lirë Hainan.
Për të promovuar dhe ofruar shërbime më të mira për investitorët e huaj, Kina do të vazhdojë të presë aktivitetet ndërkombëtare të bashkëpunimit të investimeve industriale, të përmirësojë kanalet e komunikimit për bizneset e huaja dhe t’u përgjigjet problemeve dhe kërkesave të arsyeshme të ndërmarrjeve në kohën e duhur, theksoi Yuan.
Të dhënat zyrtare tregojnë se investimet e huaja direkte në territorin kinez, në përdorim aktual, u rritën me 2.2 për qind në bazë vjetore në 499.46 miliardë juanë (rreth 69.79 miliardë dollarë amerikanë) në katër muajt e parë të vitit.
Në veçanti, investimet e huaja direkte në sektorin e prodhimit dhe të teknologjisë së lartë u rritën përkatësisht me 4.1 për qind dhe 12.8 për qind nga e njëjta periudhë e një viti më parë.
“Këto projekte të financuara nga jashtë e kanë ndihmuar vendin të optimizojë strukturën e tij industriale, të promovojë zhvillimin e koordinuar në të gjithë rajonet dhe të nxisë një model të ri zhvillimi”,- tha Yuan. (Irma)
