Ministria e Punëve të Brendshme filloi të kryejë kontrolle te nxënësit e të gjitha shkollave të mesme në Shkup, gjoja për arsye parandaluese, dhe qëllimi ishte parandalimi i “sjelljeve deviante”. Kjo praktikë për Meta.mk u konfirmua nga MPB, duke vënë në dukje se kontrollet kryhen në bashkëpunim me shërbimet pedagogjike dhe psikologjike të shkollës. Informacioni u konfirmua nga drejtori i gjimnazit “Nikolla Karev”, Andrej Manolev. Autoritetet nga Qyteti i Shkupit, të cilët mbikëqyrin shkollat e mesme, thonë se policia nuk ka nevojë për leje për të hyrë në shkolla dhe për të kryer kontrolle, shkruan Portalb.mk.
“Sipas një plani të përgatitur më parë, zyrtarët policorë nga SPB Shkup kryejnë kontrolle te nxënësit në hyrje të shkollave, bashkërisht në bashkëpunim me shërbimet psikologjike dhe pedagogjike”, thonë nga MPB. Nga atje shtojnë se kontrollet janë të një natyre parandaluese që synojnë parandalimin e fenomeneve devijuese, si dhe zbulimin e bartjes eventuale të drogave narkotike dhe armëve.
“Siguria në shkolla është një nga prioritetet e policisë”, nënvizojnë nga MPB.
Drejtori i gjimnazit “Nikolla Karev” – Shkup, Andrej Manolev, për Meta.mk thotë se kontrolle të tilla të paparalajmëruara në këtë shkollë ka për një kohë të caktuar dhe ai personalisht mendon se kjo është në rregull për sigurinë e të gjithëve.
“Vitin e kaluar ndodhi te një nxënës të gjendjet një thikë e vogël pikniku, por pavarësisht nga ai rast, ka kontrolle të tilla nga Ministria e Brendshme dhe inspektorët që ndodhin pa paralajmërim për një periudhë të caktuar. Personalisht, mendoj se është e drejtë ta bëjmë atë në mënyrë parandaluese, për sigurinë e të gjithëve”, tha drejtori Manolev.
Duke e pasur parasysh se shkollat e mesme janë në kuadër të Qytetit të Shkupit, pyetëm se nëse nga atje kanë dhënë leje për kontrolle të tilla në çantat e shpinës së nxënësve. Nga atje thanë se Policia nuk ka nevojë për leje nga zyrtarët e qytetit për të hyrë në shkolla sepse ata janë të shqetësuar për sigurinë.
“Konkretisht për kontrollet në Nikolla Karev, bëhet fjalë për kontroll polic-inspektues të organizuar nga Ministria e Brendshme, përkatësisht nga stacioni policor Karposh. Por kontrollet nuk po ndodhin vetëm në këtë gjimnaz, mund të ketë aktivitete të ngjashme edhe në shkolla të tjera. Qëllimi i aktivitetit është të parandalojë situata të mundshme të padëshiruara. Qyteti i Shkupit mirëpret të gjitha aktivitetet e institucioneve që kontribuojnë në siguri më të madhe për të gjithë nxënësit e shkollave të mesme”, thonë nga Qyteti i Shkupit.
Siç ka mësuar Meta.mk, këto kontrolle për lëndë narkotike dhe armëve nuk kanë lidhje me protokollet e Ministrisë së Brendshme që u vendosën pas një sërë paralajmërimeve të rreme për bombat e vendosura në shkolla, kur shkollat e mesme të Shkupit u përfshin në këto paralajmërime më së shumti. Në atë kohë, Ministria e Punëve të Brendshme, ndaloi raportimin nëse dhe ku kishte raportime për mjete shpërthyese të vendosura në shkollat fillore dhe të mesme, si dhe në objekte të tjera në vend. Protokollet e reja u miratuan për të minimizuar panikun dhe nervozizmin në publik dhe për të siguruar që jeta e përditshme e nxënësve, stafit mësimor dhe prindërve të jetë pa stres të panevojshëm.
Përveç kësaj, ekzistonte një protokoll që konsiderohej konfidencial. Sipas dëshmive të stafit arsimor në shkolla në atë kohë, policia bënte kontrolle para fillimit të mësimit dhe nuk lejohej të hynte askush në ambientet e shkollave pa paralajmërim. Në të njëjtën kohë, siguria private e institucioneve arsimore kontrollonte të huajt si në hyrje ashtu edhe në dalje të shkollës, dhe kamerat e sigurisë duhej të ndizeshin gjatë gjithë kohës.
