Një përkthyes afgan që u ka ndihmuar ushtarëve shqiptarë në Afganistan në misionin e NATO-s ka shprehur frikën se talebanët do t’i vrasin të gjithë që kanë qenë kundër tyre.
Në një intervistë për “Top-Channel”, një përkthyes nga Kabuli ka thënë se NATO ka ndihmuar shumë Afganistanin, dhe largimi i trupave të tyre nënkupton situatë krejt tjetër për Afganistanin.
“Ne u punësuam në NATO për të mirën e familjeve tona, për një jetë më të mirë e shkollim të fëmijëve tanë. Tani ndodhem i fshehur në Kabul. Kam ndërprerë çdo lidhje me familjen time për të mos i rrezikuar ata nga puna që kam bërë si përkthyes e më pas edhe për shërbimin inteligjent të vendit tim. Në të shkuarën, kur punonim për NATO-n, natyrisht ishim të fiksuar nga talebanët. Tani duhet të fshihemi. Ata janë duke na kërkuar neve, që punuam për NATO-n apo Ushtrinë Amerikane, me qëllimin për të na vrarë”, ka thënë ai.
Sipas tij, më shumë se 20 mijë punëtorë të tillë po përballen me rreziqe e s’po guxojnë t’i afrohen as aeroportit për të ikur.
“Ata po na kërkojnë, pasi na quajnë ‘djemtë e këqij’ sepse ne punuam për NATO-n. Ata nuk kanë mëshirë. Nuk do të na e falin pse ne u punësuam me NATO-n apo Ushtrinë Amerikane. Nuk do të kenë mëshirë për ne. Do të na vrasin. Asgjë tjetër”, është shprehur ai.
Kosova e Shqipëria janë ndër vendet që janë zotuar se do t’i pranojnë refugjatët afganë, pas kërkesës së Shteteve të Bashkuara të Amerikës.
