Ish-presidenti Stevo Pendarovski ka deklaruar se për çështjet strategjike të Maqedonisë së Veriut nevojitet mirëkuptim dhe pajtim mes maqedonasve dhe shqiptarëve.
Duke folur në konferencën kushtuar 25-vjetorit të Marrëveshjes Kornizë të Ohrit në Shkup, Pendarovski theksoi se dy komunitetet vazhdojnë ta shohin ndryshe këtë marrëveshje.
Sipas tij, vendi e fitoi statusin kandidat për anëtarësim në BE kryesisht falë zbatimit të suksesshëm të Marrëveshjes së Ohrit, një fakt që, sipas Pendarovskit, nuk është vlerësuar sa duhet nga maqedonasit.
Në konferencë u theksua gjithashtu rëndësia e forcimit të besimit mes komuniteteve dhe institucioneve. Ministri për Marrëdhënie Ndërmjet Bashkësive, Agon Ferati, vuri theksin te komunikimi dhe mirëkuptimi, ndërsa ambasadorja gjermane Petra Dreksler foli për rëndësinë e besimit të ndërsjellë për të ardhmen e vendit.
Pjesëmarrësit kërkuan edhe përfshirje më të madhe të të rinjve në debatet për bashkëjetesën dhe të ardhmen e Maqedonisë së Veriut.
