Pas dorëheqjes së Ana Çupeskës, LSDM do të mbetet pa edhe një nga katër nënkryetarët e zgjedhur pas ardhjes së Venko Filipçes në krye të partisë opozitare. Sipas informacioneve jozyrtare të “Fokus”, Metodija Ilievski pritet të shkarkohet për shkak të sjelljes së papërgjegjshme gjatë zgjedhjeve. Tashmë dihet se nënkryetari i ri i partisë do të jetë Aleksandar Trajanovski, me çka pritet të përmbyllen ndryshimet në kryesinë e ngushtë të socialdemokratëve.
Mes dy raundeve të zgjedhjeve lokale, si dhe menjëherë pas përfundimit të ciklit zgjedhor, erdhën disa dorëheqje nga funksionarë të LSDM-së, nga të cilat më e bujshmja ishte ajo e nënkryetares së partisë dhe profesoreshës universitare Ana Çupeska.
Përveç saj, dorëheqje dha edhe kandidati për kryetar të komunës së Gjorçe Petrovit, Kostadin Acevski, i cili kërkoi dorëheqjen e të gjithë udhëheqjes së partisë, me në krye liderin Venko Filipçe. Ky i fundit, megjithatë, deklaroi më herët se nuk kishte ndërmend të largohej, por do të vazhdonte punën për konsolidimin e partisë.
Ndërkohë, Filipçe paralajmëroi ndryshime në udhëheqjen partiake dhe publikisht promovoi Aleksandar Trajanovskin si nënkryetar të ri, i cili deri tani ishte anëtar i Bordit Ekzekutiv të LSDM-së dhe kandidat për kryetar të Komunës së Aerodromit në zgjedhjet lokale.
Sipas informatave të “Fokus”, do të ketë edhe një ndryshim tjetër kadrovik në kryesinë e ngushtë të LSDM-së, pasi së shpejti Metodija Ilievski do të shkarkohet. Filipçe ka vlerësuar se Ilievski nuk ka qenë mjaftueshëm i përgjegjshëm për të vazhduar detyrën si nënkryetar, pasi, ndër të tjera, ai kishte udhëtuar jashtë vendit pak para zgjedhjeve.
– Është e papranueshme që një funksionar përgjegjës, e aq më tepër një nënkryetar, të largohet jashtë vendit pavarësisht arsyeve, derisa zgjat procesi zgjedhor, e veçanërisht në prag të ditës së votimit – tha një funksionar i lartë partiak.
Me këtë, ndryshimet kadrovike në udhëheqjen e ngushtë të LSDM-së pritet të përmbyllen, që do të thotë se partia, në vend të katër nënkryetarëve si deri më tani, në të ardhmen do të ketë tre, mes të cilëve i vetmi i ri do të jetë Trajanovski.
Kështu, në postet e nënkryetarëve mbesin Kristina Kostova dhe Kaja Shukova, pavarësisht rezultatit të dobët të Shukovës si kandidate për kryetare të Shkupit, duke qenë se ajo nuk arriti të hynte në raundin e dytë.
Sa i përket funksioneve të tjera të larta partiake, zëvendëskryetare mbetet Fani Karanfilova-Panovska, ndërsa sekretar i përgjithshëm Aleksandar Sasha Dimitrijeviq.
Udhëheqja e LSDM-së po shqyrton formimin e një organi këshillëdhënës partiak, ku do të ftohen ish-figura të rëndësishme socialdemokrate, por edhe persona jopartiakë aktivë në jetën publike që kanë prirje majtiste.
Në këtë organ pritet të ftohen edhe shumë socialdemokratë kritikë ndaj udhëheqjes aktuale të partisë. Ndër ta është edhe ish-sekretari i përgjithshëm dhe ish-ministri i Brendshëm, Oliver Spasovski, aktualisht koordinator i grupit parlamentar të LSDM-së.
Kohët e fundit, Spasovski ka qenë aktiv me kritika dhe deklaroi se kishte ofruar dorëheqjen nga pozita e koordinatorit të grupit parlamentar, por jo për shkak të rezultatit zgjedhor, të cilin ai e quajti “fundin”, por për shkak të rezolutës për vijat e kuqe ndaj Bullgarisë.
Sipas burimeve partiake, pjesë e deputetëve të LSDM-së, përfshirë Spasovskin, kanë qenë kundër propozimit të kësaj rezolute gjatë fushatës zgjedhore, duke vlerësuar se kjo temë i kishte kushtuar shumë partisë në zgjedhjet parlamentare të vitit të kaluar.
Problemi kryesor shpërtheu kur Çupeska, në emër të LSDM-së, e dorëzoi rezolutën në Kuvend pa e njoftuar paraprakisht Spasovskin. Filipçe më pas i sqaroi se kishte qenë një keqkuptim, pasi Çupeska duhej ta dërgonte te partitë, jo në arkivin parlamentar.
Në fund, Kuvendi nuk e procedoi rezolutën për shkak të mangësive teknike, edhe pse ajo u bë temë e madhe në fushatë dhe pjesë e konfrontimeve ndërpartiake.
