Partitë politike janë të ndara në pritjet e tyre për fillimin e negociatave për anëtarësim në Bashkimin Evropian. LSDM, BDI dhe Alternativa besojnë në presidencën kroate me BE-në, duke qenë optimistë se këtë vit, respektivisht këtë pranverë BE-ja do ta ndreq gabimin e vitit të kaluar dhe do ta jep dritën jeshile për fillim të negociatave.
Për vetëm 2 vjet e gjysmë nga shtet i kapur, LSDM përmes politikave shtetërore e ktheu shtetin në rrugën e vërtetë drejtë integrimit në NATO dhe BE. NATO është qëllim strategjik tashmë i realizuar, reformat janë bërë për t’iu bashkuar BE-së. Presim që këtë vit të përmirësohet gabimi historik i Unionit”-pohoi Millan Zhivkoviç, LSDM.
Nëse 2019-ta ishte viti i NATO-s, BDI pret që 2020-ta të jetë vit i Evropës. Presim shumë nga presidenca kroate veçanërisht edhe për shkak të faktit se të gjithë në BE e kuptuan se gabuan. Andaj presim së shpejti miratimin e metodologjisë së re, pastaj raport të jashtëzakonshëm në shkurt dhe vendim për fillim të bisedimeve në mars. Mirëpo e jona është të vazhdojmë të punojmë, kurse premtimet do t’ia lëmë BE-se t’i bëjë”-thonë nga BDI.
Presim që Kroacia të jetë më e fokusuar në Ballkan. Andaj edhe pritjet tona për marrjen e datës për fillim të negociatave me Bashkimin Evropian do të jenë shumë më të mëdha në këtë gjashtëmujorësh gjatë të cilit Kroacia do të kryeson me BE-në”-thonë nga Alternativa.
Nga ana tjetër, partitë e tjera janë skeptike se qasja e BE-së në raport me vendin do të ndryshojë, pavarësisht angazhimit evendual të Kroacisë. Ndonëse me një dozë të vogël shprese, Lëvizja Besa thekson se hapja e negociatave nuk varet vetëm nga Kroacia.
Është pozitive që një shtet mik i Maqedonisë së Veriut e merr kryesimin e BE-së. Në raport me hapjen eventuale të negociatave, për fat të keq shumë pak ose thuajse aspak nuk varen nga kryesuesi i BE-së, por nga vendimarrja konsensuale e të gjitha shtetëve. Duke pasur parasysh qasjen nga takimi i fundit i Samitit Evropian dhe qëndrimin e disa shteteve e në veçanti të Francës, nuk presim ndonjë ndryshim në raport me Maqedoninë e Veriut gjatë presidencës të Kroacisë”-theksojnë nga Lëvizja Besa.
Reformat e parealizuara në sistemin e drejtësisë dhe administratës publike e bëjnë Aleancën për Shqiptarët pesimiste. Sipas kësaj partie edhe organizimi i zgjedhjeve të prillit janë poaq të rëndësishme për fillimin e negociatave.
Koha nuk premton që kjo Qeveri, kjo strukturë e tanishme qeveritare të jetë e aftë që në periudhë të shkurtër t’i realizojë të gjitha këto ndryshime që janë të pritshme dhe të kërkuara nga ana e Këshillit Evropian. Gjithsesi se ekziston një dozë e optimizmit, por nevojitet më tepër angazhim nga subjektet në Qeveri dhe ata që do ta marrin përsipër më vonë qeverisjen me Republikën e Maqedonisë së Veriut”-pohoi Arianit Hoxha, Aleanca për Shqiptarët.
VMRO DPMNE-ja është e bindur se negociatat nuk do të fillojnë dhe për këtë fajëson qeverisjen e Zoran Zaevit.
Presidenca me BE-në ndryshon në 6 muaj, Kroacia mbase është vendi i gjashtë që kryeson që kur Zaev qeveris me Maqedoninë. Rezultati është i njëjtë edhe përskaj shkeljes së vullnetit të popullit nga ana e Zaevit, të shprehur në referendum për ndryshim të Kushtetutës me qëllim ndryshimin e emrit kushtetues të Republikës së Maqedonisë. Absolutisht një nga kushtet ishte zbardhja e aferave korruptive dhe kiminele në Republikën e Maqedonisë, për çka dhe nuk kishte sukses deri tani në integrimet evropiane dhe që sërish u përmend nga ana e Francës”-tha Naum Stoilkovski, VMRO DPMNE.
Që nga 1 janari Kroacia mori Presidencën me BE-në, me ç’rast kryeministri kroat, Pelnkoviç u zotua se në Samitin e Zagrebit në maj do të fillojnë negociatat për anëtarësim me Maqedoninë e Veriut dhe Shqipërinë. Nga ana tjetër, mbetet pezull integrimi i vendit në NATO për shkak të situatës politike në Spanjë. Mbetet të shihet nëse në votimin e nesërm në ligjvënësin spanjoll, mandatari socialist, Pedro Sançez do të sigurojë mbështetjen e nevojshme për koalicionin qeveritar dhe vetëm pas normalizimit të situatës politike atje, të mund të pritet ratifikimi i Protokollit për anëtarësimin e Maqedonisë së Veriut në NATO. Nga Kuvendi i Shkupit nuk japin informacione nëse dhe kur do të vendoset në rend dite nënshkrimi i parakohshëm i Marrëveshjes përfundimtare për anëtarësim në NATO, nismë kjo e Qeverisë për të mos u bllokuar integrimi i vendit me shpërbërjen e Kuvendit për zgjedhjet e prillit./Alsat
