Aeroportet evropiane përballen me një mungesë kritike të karburantit të avionëve që mund të pengojë udhëtimin ajror në të gjithë rajonin dhe, për rrjedhojë, të përkeqësojë goditjen ekonomike nga lufta me Iranin, ka paralajmëruar një organizatë e industrisë.
“Në këtë fazë, ne kuptojmë se nëse kalimi nëpër Ngushticën e Hormuzit nuk rifillon në mënyrë të konsiderueshme dhe të qëndrueshme brenda 3 javëve të ardhshme, (a) një mungesë sistemike e karburantit të avionëve pritet të bëhet realitet për (Bashkimin Evropian),” tha ACI Europe, e cila përfaqëson aeroportet evropiane, në një letër të datës 9 prill drejtuar Dan Jørgensen dhe Apostolos Tzitzikostas, zyrtarë të lartë të Komisionit Evropian, organit ekzekutiv të BE-së.
“Reduktimi i lidhjes ajrore që do të rezultonte në mënyrë të pashmangshme… do të dëmtonte ndjeshëm ekonominë evropiane – duke përkeqësuar kështu ndikimin makroekonomik të rritjes së çmimeve të naftës,” thuhet në letrën, e ndarë me CNN.
ACI Europe tha se afrimi i “sezonit kulmor të verës,” kur rritja e udhëtimeve ajrore mbështet turizmin – thelbësor për shumë ekonomi të BE-së – vetëm sa i shton këto shqetësime.
Organizata bëri thirrje për “monitorim urgjent” të furnizimit me karburant për avionë gjatë gjashtë muajve të ardhshëm, mes masave të tjera. Paralajmërimi i saj për një mungesë të afërt përputhet me një alarm të ngjashëm nga drejtori i Agjencisë Ndërkombëtare të Energjisë më herët këtë muaj.
Disa kompani ajrore, përfshirë Air Neë Zealand dhe Vietnam Airlines, kanë filluar të shkurtojnë fluturimet ndërsa çmimet e karburantit për avionë janë rritur ndjeshëm. Edhe kompania amerikane Delta Air Lines tha këtë javë se do të reduktojë numrin e fluturimeve “derisa situata me karburantin të përmirësohet.”
Çmimi mesatar global i karburantit për avionë është më shumë se dyfish krahasuar me një vit më parë, sipas Shoqatës Ndërkombëtare të Transportit Ajror.
