Kryeministri i Izrael, Benjamin Netanyahu, ka lëshuar një paralajmërim të fortë ndaj liderit të ri suprem të Iranit gjatë konferencës së tij të parë për shtyp që nga fillimi i luftës, duke mbrojtur sulmet e përbashkëta ushtarake të Izraelit dhe Shtetet e Bashkuara të Amerikës.
Netanyahu deklaroi se Irani “nuk është më i njëjti” pas pothuajse dy javësh bombardimesh nga Izraeli dhe SHBA-të, duke shtuar se Teherani ka pësuar goditje të rënda.
Sipas tij, Izraeli synon të ndalojë Iranin që të zhvendosë projektet e tij bërthamore dhe balistike në objekte nëntokësore. Netanyahu tha gjithashtu se disa nga sulmet izraelite kanë vrarë shkencëtarë të rëndësishëm bërthamorë iranianë.
Lideri izraelit paralajmëroi se vendi i tij do të vazhdojë sulmet edhe ndaj Hezbollahut, pasi grupi i mbështetur nga Irani hapi zjarr më 2 mars në shenjë hakmarrjeje për vrasjen e liderit suprem iranian në fillim të konfliktit.
I pyetur për mundësinë e veprimeve ndaj liderit të ri suprem iranian, Mojtaba Khamenei, dhe kreut të Hezbollahut, Naim Qassem, Netanyahu tha se nuk do të “garantonte sigurinë e jetës” për liderët e organizatave që ai i konsideron terroriste.
Ai shtoi gjithashtu se Irani dhe Hezbollah nuk përbëjnë më të njëjtin kërcënim si më parë, duke theksuar se Izraeli mund të krijojë kushte për një ndryshim regjimi në Iran, por se kjo varet nga vetë populli iranian.
“Në fund të fundit varet nga ju. Është në duart tuaja”, u shpreh Netanyahu.
Kryeministri izraelit zbuloi gjithashtu se mban kontakte të përditshme dhe të drejtpërdrejta me presidentin amerikan Donald Trump gjatë zhvillimeve të fundit të konfliktit.
