Netanjahu i gatshëm për negociata paqësore me palestinezët

Kryeministri izraelit Benjamin Netanjahu ka shprehur gatishmërinë për të negociuar paqen me palestinezët.

“Izraeli është i gatshëm për negociata. Unë jam i gatshëm për negociata dhe besoj se shumë vende arabe shpresojnë të hyjmë në negociata të tilla me palestinezët”, tha Netanjahu në video mesazh të transmetuar këtë mëngjes në samitin virtual, të organizuar nga grupi “Të krishterët të bashkuar për Izraelin”.

Duke folur për qëllimin e Izraelit për të vendosur sovranitet mbi pjesë të Bregut Perëndimor, Netanjahu tha se “nuk do të zvogëlojë shanset e paqes, por do të kontribuojë për paqen”.

“Vizioni i presidentit amerikan (Donald Tramp) më në fund i jep fund iluzionit për zgjidhjeje (sipas modelit) të dy shteteve dhe bën thirrje për zgjidhje të vërtetë për dy shtete”, deklaroi Netanjahu, duke shtuar se palestinezët duhet gjithashtu të mbështesin planin e paqes së Trampit.

Debati zyrtar mbi aneksimin do të fillojë në parlamentin izraelit më 1 korrik. Netanjahu ka premtuar aneksimin e Luginës strategjike të Jordanit dhe të gjitha vendbanimeve hebraike, rreth 30 për qind të Bregut Perëndimor, sipas planit amerikan të zbuluar në muajin janar. Bazuar në atë plan, palestinezët do të krijonin shtetin e tyre në pjesët e mbetura të Bregut Perëndimor, por duke përmbushur seri të kushteve strikte. Palestinezët dëshirojnë të krijojnë shtetin e tyre në të gjithë territorin, i cili përfshin Rripin e Gazës me Jerusalemin si kryeqytetin e tij. SHBA më parë e kanë pranuar Jerusalemin si kryeqytetin e Izraelit.

Sidoqoftë, mediat izraelite kanë raportuar ditët e fundit se Izraeli ka njoftuar presidentin palestinez Mahmud Abas se nuk planifikon të aneksojë Luginën Jordan, por aneksimi do të kufizohet në dy ose tre blloqe vendbanimesh hebraike./MIA

Loading...