Këshilli i Sigurimit i OKB-së do të votojë të hënën për një rezolutë që mbështet planin e paqes së presidentit të SHBA-së, Donald Trump, në Gaza.
Javën e kaluar, amerikanët nisën zyrtarisht negociatat brenda Këshillit të Sigurimit prej pesëmbëdhjetë anëtarësh mbi një tekst që mbështeste planin e Trumpit për periudhën pas armëpushimit në luftën dyvjeçare midis Izraelit dhe Hamasit.
Një projektrezolutë e parë “mirëpret krijimin e Komitetit të Paqes”, një organ qeverisës kalimtar për Gazën, ndoshta i kryesuar nga Trump me një mandat deri në fund të vitit 2027.
Do të autorizonte shtetet anëtare të formonin një “Forcë të Përkohshme Ndërkombëtare të Stabilizimit (ISF)” për të bashkëpunuar me Izraelin dhe Egjiptin, si dhe me policinë palestineze të trajnuar rishtazi, për të ndihmuar në sigurimin e zonave kufitare dhe demilitarizimin e Rripit të Gazës.
Ndryshe nga draftet e mëparshme, ai i fundit përmend një shtet të mundshëm palestinez në të ardhmen.
Bëhet e ditur se SHBA dhe disa vende arabe dhe myslimane, përfshirë Egjiptin, Arabinë Saudite dhe Turqinë, i kërkuan Këshillit të Sigurimit të OKB-së që ta miratojë shpejt rezolutën.
“SHBA, Katari, Egjipti, Emiratet e Bashkuara Arabe, Mbretëria e Arabisë Saudite, Indonezia, Pakistani, Jordania dhe Turqia shprehin mbështetjen e tyre të përbashkët për rezolutën e Këshillit të Sigurimit që është aktualisht në shqyrtim”, thuhet në deklaratën e tyre të përbashkët, duke shtuar se po bëjnë thirrje për “miratimin e shpejtë” të masës.
Ndryshe, edhe pse anëtarët e Këshillit deri më tani janë dukur se mbështesin parimet e planit të paqes, burimet diplomatike kanë vënë në dukje se ka disa probleme me tekstin amerikan, veçanërisht në lidhje me mungesën e një mekanizmi monitorimi që duhet të kryhet nga Këshilli, rolin e Autoritetit Palestinez dhe detajet e mandatit të ISF-së.
