Negociatorët ukrainas dhe amerikanë u takuan të shtunën në Florida me synimin për të gjetur një rrugëdalje në luftë midis Ukrainës dhe Rusisë, me më shumë bisedime të planifikuara për sot. Ndërsa negociatorët rusë nuk ishin të pranishëm në takim.
“Ne vazhduam të diskutonim çështjet kryesore dhe hapat e ardhshëm të procesit të negociatave. Vëmendje e veçantë iu kushtua konvergjencës së qasjeve për përparim të mëtejshëm drejt arritjes së rezultateve praktike”, tha kryenegociatorët ukrainas Rustem Umerov për X.
Mediat shkruajnë se negociatorët rusë dhe ukrainas u takuan dy herë këtë vit për bisedime të sponsorizuara nga SHBA në Emiratet e Bashkuara Arabe dhe patën një raund tjetër bisedimesh në Gjenevë në shkurt. Moska dhe Kievi ranë dakord për shkëmbimin e të burgosurve, por nuk u bë përparim i mëtejshëm.
Shtëpia e Bardhë e quajti takimin e fundit konstruktiv, me diskutime të përqendruara në kufizimin dhe zgjidhjen e çështjeve të mbetura në mënyrë që t’i afrohen një marrëveshjeje gjithëpërfshirëse paqeje.
Umerov dhe presidenti ukrainas Volodymyr Zelensky thanë se bisedimet e reja do të zhvillohen sot. Ekipi negociator i SHBA-së udhëhiqet nga Steve Whitkov, i dërguari i posaçëm i presidentit amerikan Donald Trump, dhe dhëndri i tij Jared Kushner.
Duke komentuar diskutimet, Whitkov tha për X se pala amerikane mirëpret angazhimin e vazhdueshëm për zgjidhjen e çështjeve të pazgjidhura, duke njohur rëndësinë e stabilitetit më të gjerë global. Në të njëjtën kohë, ai falënderoi Trump për udhëheqjen e tij të vazhdueshme në avancimin e përpjekjeve. Nga ana e tij, Umerov falënderoi SHBA-në për punën e vazhdueshme, e cila synon avancimin e bisedimeve.
© SYRI.net
