Burrat përballen me rrezik më të lartë vetëvrasjeje sesa gratë, dhe shumë prej tyre shmangin kërkimin e ndihmës për shkak të stigmës, thotë Instituti i Shëndetit Publik (ISHP) duke shënuar fillimin e Movember, muajit kushtuar shëndetit të burrave. Sipas të dhënave nga Enti Shtetëror i Statistikave, 89 vetëvrasje u regjistruan në Maqedoni vitin e kaluar – 68 burra dhe 21 gra, transmeton Portalb.mk.
Movember është lëvizje ndërkombëtare që zhvillohet çdo vit gjatë nëntorit, me qëllim rritjen e ndërgjegjësimit për problemet shëndetësore të burrave, duke përfshirë kancerin e prostatës, kancerin e testikujve, shëndetin mendor dhe parandalimin e vetëvrasjeve. Emri Movember është një kombinim i fjalëve angleze mustaqe dhe November, ndërsa rritja e mustaqeve është një simbol i dallueshëm i fushatës. Kjo lëvizje jo vetëm që promovon shëndetin, por gjithashtu krijon një komunitet global që i inkurajon burrat të flasin për problemet e tyre dhe të ndërmarrin një qasje proaktive ndaj mirëqenies së tyre fizike dhe mendore.
Movember filloi në vitin 2003 në Melbourne, Australi, kur një grup miqsh, të njohur si “30 Origjinalët”, vendosën të rrisnin mustaqe në nëntor për të rritur ndërgjegjësimin për shëndetin e burrave. Ideja ishte e thjeshtë, por e fuqishme: mustaqet u bënë stimul vizual për biseda rreth temave që shpesh anashkalohen. Nga fillimet modeste, Movember është rritur në një iniciativë globale, e mbështetur nga miliona pjesëmarrës në më shumë se 20 vende, duke përfshirë Shtetet e Bashkuara, Kanadanë, Mbretërinë e Bashkuar, Australinë, Maqedoninë dhe shumë vende evropiane. Lëvizja organizohet nga Fondacioni Movember, një organizatë jofitimprurëse që financon programe kërkimore dhe mbështetëse për shëndetin e burrave.
Përmes ngjarjeve, mbledhjes së fondeve dhe fushatave edukative, Movember ka mbledhur qindra miliona dollarë, të cilët janë investuar në mbi 1,250 projekte shëndetësore për burrat në të gjithë botën.
Movember përqendrohet në tre fusha kryesore të shëndetit të burrave: kanceri i prostatës, kanceri i testikujve dhe shëndeti mendor dhe parandalimi i vetëvrasjeve.
Kanceri i prostatës është një nga llojet më të zakonshme të kancerit tek burrat, veçanërisht tek ata mbi 50 vjeç. Kanceri i testikujve, megjithëse një formë më e rrallë e kancerit, prek kryesisht burrat e rinj (të moshës 15 deri në 35 vjeç).
“Përveç këtyre qëllimeve, Movember synon të ndryshojë normat shoqërore që i pengojnë burrat të flasin për problemet e tyre. Fushata i inkurajon burrat të jenë të hapur, të kërkojnë mbështetje dhe të bëjnë jetë më të shëndetshme. Burrat shpesh shmangin kontrollet mjekësore ose nuk flasin për problemet e tyre shëndetësore për shkak të pritjeve kulturore se ata duhet të jenë “të fortë” dhe “të pavarur”. Kjo mund të çojë në diagnostikim të vonë të sëmundjeve serioze, siç është kanceri i prostatës ose i testikujve. Movember përdor simbolikën e mustaqeve për të filluar biseda dhe për të thyer stigmën që rrethon këto tema. Përmes fushatave, burrat edukohen për rëndësinë e kontrolleve të rregullta dhe masave parandaluese”, thotë ISHP-ja.
Shëndeti mendor është një nga fushat më të rëndësishme, por më të neglizhuara të shëndetit të burrave. Sipas statistikave, burrat kanë tre deri në katër herë më shumë gjasa të kryejnë vetëvrasje sesa gratë.
“Këtë vit, ISHP planifikon ta shënojë këtë muaj me aktivitete të ndryshme në çdo javë të nëntorit. Konkretisht, instituti do të ketë aktivitete që lidhen me një fushë të ndryshme të shëndetit të meshkujve çdo javë, me qëllim që të rrisë ndërgjegjësimin më gjerësisht për të gjitha problemet me të cilat përballen burrat gjatë gjithë jetës së tyre, dhe jo vetëm për të vënë theksin te kanceri i prostatës, siç ndodh zakonisht në botë. Pra, përveç sëmundjeve më të zakonshme që prekin burrat, do të flasim për shëndetin mendor të burrave, aktivitetin fizik, ushqyerjen e duhur dhe presionin që shoqëria u bën burrave”, thonë nga ISHP.
