Mijëra fluturime në të gjithë Shtetet e Bashkuara që ishin planifikuar për fundjavë janë anuluar, pasi një stuhi e madhe nisi të shkaktojë kaos të shtunën në shumë pjesë të vendit, duke ndërprerë furnizimin me energji elektrike dhe duke bllokuar rrugët kryesore me akull të rrezikshëm.
Borë e madhe, shira të ngrirë dhe shi me akull kërcënojnë rreth 180 milionë njerëz, më shumë se gjysmën e popullsisë së SHBA-së, në një zonë që shtrihet nga malet Rocky në jug deri në New England, sipas Shërbimit Kombëtar të Motit, që publikoi paralajmërimin të shtunën vonë në mbrëmje. Autoritetet paralajmëruan qytetarët të përgatiten për disa ditë të ftohta ekstreme.
“Borë dhe akulli do të shkrihen shumë ngadalë dhe nuk do të zhduken së shpejti, gjë që do të pengojë çdo përpjekje për rikuperim,” tha Allison Santorelli, meteorologe në Shërbimin Kombëtar të Motit.
Presidenti Donald Trump kishte miratuar deri të shtunën deklaratat e emergjencës për të paktën një duzinë shtetesh, dhe pritet që të shpallen edhe të tjera. Agjencia Federale për Menaxhimin e Emergjencave (FEMA) kishte vendosur paraprakisht furnizime, staf dhe ekipe kërkimi dhe shpëtimi në disa shtete, tha Sekretarja e Sigurisë Kombëtare, Kristi Noem.
“Ne kërkojmë vetëm që të gjithë të jenë të zgjuar – qëndroni në shtëpi nëse është e mundur,” tha Noem.
