Argjentinasi ka folur për dallimet mes PSG-së dhe Barcelonës
Deri në ditën kur Lionel Messi të pensionohet, duket se gjithmonë do të ketë zëra që e lidhin atë me një rikthim në Barcelonë.
Askush nuk e imagjinonte kurrë të shihte argjentinasin të largohej nga ‘Blaugrana’, duke pasur parasysh kohën që kaloi atje, derisa u transferua në Francë. Messi aktualisht është nën kontratë me Paris Saint-German deri më 30 qershor 2023, dhe atëherë ai do të duhet të marrë një vendim nëse dëshiron të rinovojë kontratën apo ta çojë karrierën e tij në një drejtim të ri.
Sipas raportimeve të fundit të ‘Marca’, argjentinasi preferon Parisin para Barcelonës, përcjell lajmi.net.
“Ishte e vështirë të largohesha nga Barcelona, ne kishim kaluar gjithë jetën në të njëjtin vend. Nuk kisha lëvizur kurrë dhe nuk e dija se si ishte largimi. Nuk e prisja këtë, ndodhi shumë shpejt dhe më duhej të largohesha nga Barcelona brenda natës”, tha fillimisht argjentinasi.
Megjithatë, kur bëhet fjalë për një rikthim të mundshëm te Barcelona, duket se Messi është më i interesuar të qëndrojë në Francë.
“Parisi më pëlqen shumë më tepër, e eksploroj qytetin dhe e shoh të mrekullueshëm. Gjatë vitit tim të parë pati një ndryshim të madh, gjërat ndodhën shumë papritur. Nuk ishte qëllimi im të largohesha nga Barcelona dhe gjithçka ishte e papritur”, përfundoi ai.
Kujtojmë që Messi aktualisht është i fokusuar në Kupën e Botës, pasi synon ta fitojë atë trofe për herë të parë.
