Forcat e operacioneve speciale amerikane dhe marinsat kanë trajnuar fshehurazi trupat tajvaneze që nga viti 2020, duke rrezikuar kështu zemërimin e Kinës, sipas raporteve të mediave.
“Wall Street Journal”, duke cituar zyrtarë të paidentifikuar, raportoi të enjten se rreth dhjetëra anëtarë të shërbimit amerikan kishin trajnuar forcat tokësore dhe detare të Tajvanit “për të paktën një vit”, një periudhë gjatë së cilës Kina ka rritur aktivitetet ushtarake dhe kërcënimet politike kundër ishullit të vetëqeverisur, për të cilin Kina pretendon se është i veti, raporton “AlJazeera”.
Agjencia e lajmeve “Reuters” raportoi më vonë se dy burime të njohura me çështjen kanë thënë se trajnerët ishin zëvendësuar periodikisht në Tajvan në një bazë të përkohshme, transmeton Zeri.info.
Burimet, të cilët folën në kushte anonimiteti, refuzuan të thonë se sa kohë kishte zgjatur trajnimi, por thanë se ai kishte filluar para se Joe Bideni të merrte detyrën si president në janar.
Ministria e Mbrojtjes e Tajvanit nuk pranoi të komentojë raportin e “Journal”-it, por i tha “Reuters”-it se “të gjitha shkëmbimet ushtarake kryhen në përputhje me planet vjetore”.
Pentagoni nuk e konfirmoi ose mohoi raportin.
Zëdhënësi John Supple tha se mbështetja e SHBA-së për ushtrinë e Tajvanit vlerësohet në bazë të nevojave të saj të mbrojtjes.
“Mbështetja jonë dhe marrëdhënia mbrojtëse me Tajvanin mbetet e barabartë me kërcënimin aktual të paraqitur nga Republika Popullore e Kinës”, tha Supple në një deklaratë.
“Ne i bëjmë thirrje Pekinit të respektojë angazhimin e tij për zgjidhjen paqësore të dallimeve” me ishullin.
Raporti duket se konfirmoi artikujt e mediave të Tajvanit nëntorin e kaluar – të cilët cituan Komandën Detare të Tajvanit – se trupat amerikane kishin mbërritur atje për të trajnuar marinsat e Tajvanit dhe forcat speciale në operacione me anije të vogla dhe amfibë.
Këto raporte u mohuan më pas nga zyrtarët amerikanë dhe tajvanezë, të cilët theksuan se të dyja palët ishin të përfshira në shkëmbimet dhe bashkëpunimin ushtarak dypalësh.
SHBA-ja mban një angazhim të paqartë për të mbrojtur Tajvanin dhe e furnizon atë me pajisje ushtarake dhe armë, duke përfshirë raketa dhe aeroplanë luftarakë. Pekini nuk ka përjashtuar përdorimin e forcës për të marrë kontrollin e ishullit, i cili ndahet nga Kina kontinentale nga një kanal detar rreth 161 km i gjerë.
Një video e publikuar vitin e kaluar dhe e shfaqur në mediat e Tajvanit tregonte trupat amerikane teksa merrnin pjesë në një stërvitje në ishull të quajtur “Balance Tamper”.
Forcat kineze kanë shtuar aktivitetet e tyre drejt Tajvanit vitin e kaluar, duke kryer stërvitje sulmesh detare dhe duke ngritur në ajër modele të mëdha bombarduesish dhe luftëtarësh pranë hapësirës ajrore të Tajvanit.
Të hënën, Tajvani tha se identifikoi 56 aeroplanë kinezë në zonën e tij të mbrojtjes ajrore, në një seri manovrash ushtarake që filluan të premten, në Ditën Kombëtare të Kinës dhe e detyruan ishullin të ngrejë aeroplanë luftarakë si kundërpërgjigje.
Këshilli i Çështjeve të Territorit (MAC), organi më i lartë politikëbërës i Tajvanit në Kinë, akuzoi Pekinin se “dëmtoi seriozisht status quo-në e paqes dhe stabilitetit në Ngushticën e Tajvanit” me ndërhyrjet e tij të fundit të mëdha.
Zëdhënësi i Departamentit Amerikan të Shtetit, Ned Price, e quajti aktivitetin kinez “destabilizues” dhe “provokues”.
“Ne i bëjmë thirrje Pekinit që të pushojë presionin dhe forcën ushtarake, diplomatike dhe ekonomike kundër Tajvanit”, tha ai, duke e quajtur angazhimin e SHBA-së ndaj ishullit “të fortë”.
Të mërkurën, presidenti amerikan Joe Biden tha se kishte folur me presidentin kinez Xi Jinping për Tajvanin.
I pyetur nga një reporter në lidhje me “provokimin e Kinës mbi Tajvanin”, Bideni tha të martën se ai dhe Xi kishin diskutuar çështjen.
