Mustafa e ka goditur që në start Kurtin, duke ia dërguar në kabinetin qeverisës Agim Veliun, për të cilin vetëm simpati nuk gëzojnë në Vetëvendosje.
Agim Veliu pritet të jetë ministër i Punëve të Brendshme, një ministri kjo që e kishte kërkuar me ngulm Vetëvendosje dhe që ishte bërë “mollë sherri” në negociatat për koalicion mes Isa Mustafës e Albin Kurtit.
Ky hap i Mustafës konsiderohet si mesazh i fortë për kryeministrin Kurti, se nuk do të lejohet dominimi i tij në Qeveri, por se do të ketë punë me dikë që njihet si njeri i fortë dhe për fuqinë që ka në LDK dhe në terren.
Agim Veliu ishte zëri i vetëm brenda LDK-së që ka kundërshtuar koalicionin me Vetëvendosjen, duke insistuar se ndarja e pushtetit mes dy partive duhej ta balanconte vullnetin qytetar të shprehur më 6 tetor në zgjedhjet e përgjithshme.
Ditë më parë, duke komentuar deklarimin e Nënkryetarit të LDK-së, Agim Veliu, i cili qe shprehur pesimist për arritjen e marrëveshjes për bashkëqeverisje me VV-në, Albulena Haxhiu pat deklaruar se “qëndrimet e Agim Veliut tashmë i dimë”.
“Ne nuk po e presim qëndrimin e Agim Veliut, por të Këshillit Drejtues”, ishte shprehur ajo.
Nëse Agim Veliu zgjidhet Ministër, Podujeva do të shkojë në zgjedhje.
