Një ngjarje tragjike ka ndodhur në Heraklion të Kretës, ku tre persona janë vrarë dhe të paktën 15 të tjerë kanë mbetur të plagosur. Mediat greke e përshkruajnë si një hakmarrje midis dy familjeve në konflikt.
Informacionet tregojnë se autorët e krimit dogjën banesa dhe makina në shenjë hakmarrjeje pasi një bombë ishte vendosur në një shtëpi. Në terren ndodhet një forcë speciale greke për të frenuar përhapjen e mëtejshme të konfliktit të dhunshëm.
Sipas raportimeve fillestare, të vdekurit janë një grua 50-vjeçare, një burrë i ri dhe një person tjetër.
Disa nga të plagosurit janë në gjendje të rëndë.
Banorët po përdorin të gjitha mjetet që kanë – madje edhe automjete rurale – për të transportuar të plagosurit në spitalet në Heraklion, si dhe në Qendrat Shëndetësore të Moirës dhe Agia Varvarës, ndërsa EKAB ka marrë thirrje të shumta dhe ka dërguar gjashtë ambulanca për të transportuar viktimat.
Mediat greke japin alarmin dhe raportojnë se i tërë fshati Vorizia në Heraklion është në gjendje lufte.
Sipas raportimeve nga Patris.gr, janë qëlluar më shumë se 2,000 plumba. Midis të plagosurve ka edhe oficerë policie që kanë nxituar në zonë dhe janë përpjekur t’i japin fund gjakderdhjes.
Plumbat e kallashnikovit janë përhapur në të tërë fshatin.
Një forcë e fortë policore ndodhet në vendngjarje, ndërsa drejtori i përgjithshëm i policisë së Heraklionit është gjithashtu në vendngjarje për të koordinuar hetimet. Deri më tani, nuk është raportuar për arrestime apo ndalime, megjithatë, autoritetet vlerësojnë se situata mbetet jashtëzakonisht e tensionuar./BalkanWeb
