Manchester City përgatitet për transferimin e talentit argjentinas, por ai preferon Barcelonën

Talenti argjentinas Claudio Echeverri, ka qenë njëri nga lojtarët më të përfolur në botën e futbollit gjatë muajve të fundit.

Ai ka pasur një kampanjë të suksesshme në Kupën e Botës për grupmoshat U17 me kombëtaren e Argjentinës, dhe më herët gjatë kësaj jave ai ka pranuar se qëllimi i tij është të largohet nga River Plate, kur kontrata e tij të skadojë në dhjetor të vitit të ardhshëm.

Njëra ndër klubet më të interesuara për shërbimet e tij ishte dhe Barcelona, vetëm për faktin se ai mund të transferohet me një çmim më të ulët dhe kjo i ka bërë drejtuesit e klubit blaugran që të tentojnë transferimin e tij.

Mirëpo, sipas raportimeve të fundit Manchester City të cilët sapo kanë fituar Kupën e Botës për Klube, janë bërë gati për të aktivizuar klauzolën e tij të lirimit prej 25 milionë eurove tek River Plate.

 

Problemet e mëdha financiare në të cilat është duke kaluar për momentin Barcelona, e bëjnë të pamundur që ata të përballojnë këtë shumë dhe në vend të kësaj do të preferonin që të prisnin deri në verë, për ta marrë me çmim më të ulët.

Barcelona mund ta shfrytëzojë në avantazhin e saj dëshirën që Echeverri ka për t’iu bashkuar atyre, andaj gara për shërbimet e tij mbetet e hapur.

Deri më tani nuk ka pasur ndonjë lëvizje konkrete as nga Barcelona e as nga Manchester City, prandaj mbetet të shihet se si do të rrjedhin gjërat pas hapjes së afatit kalimtar në janar.

ARTIKUJ TË NGJASHËMMË SHUMË NGA AUTORI