Presidenti i Francës, Emmanuel Macron, paralajmëroi se SHBA-të dhe Evropa rrezikojnë të humbasin besueshmërinë e tyre dhe të akuzohen për “standarde të dyfishta” nëse nuk i zgjidhin luftërat në Ukrainë dhe Gaza së shpejti.
Ai gjithashtu u bëri thirrje vendeve aziatike të ndërtojnë një aleancë të re me Evropën për t’u siguruar që ato të mos bëhen “dëm kolateral” në luftën për pushtet midis SHBA-së dhe Kinës.
Macron po fliste në Dialogun Shangri-la, një samit vjetor i nivelit të lartë të mbrojtjes së Azisë që u mbajt në Singapor.
Midis të ftuarve që dëgjonin ishin Sekretari i Mbrojtjes i SHBA-së, Pete Hegseth, si dhe zyrtarë të lartë ushtarakë nga rajoni, raporton BBC, transmeton Klankosova.tv.
Macron theksoi se nëse Rusia mund të merrte territorin ukrainas “pa asnjë kufizim, pa asnjë kufizim… çfarë mund të ndodhte në Tajvan? Çfarë do të bënit ditën që diçka ndodh në Filipine?”
“Ajo që është në rrezik në Ukrainë është besueshmëria jonë e përbashkët, që ne jemi ende në gjendje të ruajmë integritetin territorial dhe sovranitetin e popullit”, tha ai. “Pa standarde të dyfishta.”
Shumë njerëz në Azi shqetësohen për paqëndrueshmëri në rajon nëse Kina përpiqet të “ribashkohet” me forcë me Tajvanin, një ishull vetëqeverisës që Pekini e pretendon si pjesë të territorit të saj. Kina është përplasur gjithashtu gjithnjë e më shumë me Filipinet për pretendime konkurruese në Detin e Kinës Jugore.
Makron më vonë iu përgjigj një pyetjeje të bërë nga korrespondenti i sigurisë i BBC-së, Frank Gardner, mbi rolin ushtarak të Evropës në Azi, ndërsa një luftë në shkallë të plotë ende po zhvillohej në kontinent.
“Nëse si SHBA-të ashtu edhe evropianët nuk janë në gjendje ta rregullojnë në afat të shkurtër situatën ukrainase, mendoj se besueshmëria e SHBA-ve dhe evropianëve që pretendojnë të rregullojnë çdo krizë në këtë rajon do të ishte shumë e ulët”, tha udhëheqësi francez.
Presidenti i SHBA-së, Donald Trump, ka ushtruar presion në rritje mbi udhëheqësit e Rusisë dhe Ukrainës për t’i dhënë fund luftës dhe duket se i ka dhënë Vladimir Putinit një afat dy-javor. Trump gjithashtu e ka qortuar më parë udhëheqësin ukrainas Volodymyr Zelensky dhe e ka akuzuar atë se “nuk është gati për paqe”.
Macron gjithashtu e shprehu pikëpamjen e tij në lidhje me standardet e dyfishta në luftën në Gaza, duke pranuar se ekzistonte një perceptim se Perëndimi i ka dhënë “kalim të lirë” Izraelit.
Ai theksoi rëndësinë e punës drejt një armëpushimi dhe njohjes reciproke të një shteti palestinez, duke thënë: “Nëse e braktisim Gazën, nëse konsiderojmë se ka një kalim të lirë për Izraelin, edhe nëse i dënojmë sulmet terroriste, ne vrasim besueshmërinë tonë në pjesën tjetër të botës.”
Në javët e fundit, udhëheqësit evropianë kanë kritikuar sulmet e Izraelit për përkeqësimin e situatës humanitare gjithnjë e më të dëshpëruar në Gaza.
