Partia maqedonase në opozitë LSDM thotë se Maqedonia po zhytet në një valë të re inflacioni në rritje, për shkak të politikës ekonomike të qeverisë së Hristijan Mickoskit.
Nga LSDM thonë se sipas të dhënave të fundit nga Enti Shtetëror i Statistikave, inflacioni vjetor është rritur në 4.5% – kaq është rritur kostoja e jetesës në qershor 2025 krahasuar me qershorin 2024.
“Në të njëjtën periudhë, çmimet me pakicë u rritën me 3.7%. Statistikat nuk gënjejnë – jeta po bëhet edhe më e shtrenjtë dhe inflacioni po shtyp dhe po ul fuqinë blerëse. Derisa Mickoski po hedh shifra të rreme për disa suksese ekonomike, realiteti në çdo shtëpi është krejtësisht i ndryshëm – portofole bosh, produkte të shtrenjta dhe familje që mezi mbijetojnë nga dita në ditë. Asnjëherë qytetarët nuk kanë qenë më të varfër se tani”.
“Inflacioni po e ha vazhdimisht jo vetëm buxhetin familjar, pagat, por edhe rritjen ekonomike. Maqedonia është larg ekonomisë së 4-t në Evropë siç dëshiron ta portretizojë Mickoski. Mburrja e tij nuk ka të bëjë fare me realitetin. Së pari, Mickoski gënjeu për rritjen e PBB-së, nuk është 3.4% siç tha ai, por 3%. Kur krahasohet me inflacionin prej 4.5%, kjo do të thotë jo vetëm që nuk ka rritje, por është negativ”.
“PBB-ja për frymë, sipas fuqisë blerëse, është vetëm 42% e mesatares së BE-së, madje vendet në rajon kanë një mesatare më të lartë se qytetarët tanë, Serbia me 51%, Mali i Zi me 53%. Ndërsa qytetarët po bëjnë llogaritjet nëse dhe sa do të blejnë ushqim apo do të paguajnë faturat, qeveria e ka përshtatur ribalancimin sipas shpenzimeve dhe luksit të vet. Nuk ka para për një pagë minimale më të lartë, por ka para për paga zyrtare më të larta”, thonë nga LSDM.
