CISCE, ekspozita e parë kombëtare në botë që përqendrohet në zinxhirët e furnizimit, filloi të martën në Pekin .
Gjatë ceremonisë së hapjes u shpall fillimi i një nisme për ndërlidhjen globale të zinxhirëve industrialë dhe furnizues, ku i bëhet thirrje botës të punojë së bashku për të nxitur liberalizimin dhe lehtësimin e tregtisë e të investimeve dhe për të pakësuar pengesat ndaj tregtisë e investimeve.
Duke folur gjatë ceremonisë së hapjes së Ekspozitës së parë Ndërkombëtare të Zinxhirit të Furnizimit të Kinës (CISCE) dhe Forumit Global të Inovacionit dhe Zhvillimit të Zinxhirit të Furnizimit, kryeministri kinez Li Qiang tha se Kina do të integrohet më thellë në zinxhirët globalë të industrisë dhe furnizimit për të ndërtuar së bashku zinxhirë të industrisë dhe furnizimit të hapur dhe përfshirës.
Kina do të ofrojë më shumë lehtësi dhe garanci për investitorët e huaj, tha kryeministri, duke shprehur shpresën se sipërmarrësit nga bota do të luajnë një rol aktiv në nxitjen e funksionimit të mirë të zinxhirëve globalë të industrisë dhe furnizimit, shkruan CMG.
Li vuri në dukje rëndësinë e zinxhirëve të industrisë dhe të furnizimit të sigurt e të qëndrueshëm, duke bërë thirrje për forcimin e bashkërendimit të burimeve për zinxhirët kryesorë industrialë në shkallë globale dhe për të mos ndërhyrë arbitrarisht në sjelljet e tregut.
Sipas tij, Kina do të vazhdojë t’i japë botës prodhime kineze me cilësi të lartë dhe furnizime kineze të qëndrueshme.
Për të ndërtuar zinxhirë të industrisë dhe furnizimit me përfitime të ndërsjella, Kina do të promovojë aktivisht bashkëpunimin lidhur me kapacitetet e industrisë dhe të prodhimit me vendet e tjera dhe do të nxisë vendet në zhvillim të marrin pjesë më thellë në zinxhirët globalë të vlerës, tha Li Qiang.
Ai shtoi se Kina mbështet me vendosmëri bashkëpunimin botëror mbi zinxhirët industrialë e të furnizimit dhe është e gatshme të punojë me të gjitha palët për të ndërtuar zinxhirë industrialë e furnizimi më të qëndrueshëm, më të efektshëm e më dinamikë.
