Kryeministri i Kosovës, Albin Kurti, ka udhëtuar për në Greqi, për të marrë pjesë në Tryezën e Rrumbullakët me Qeverinë e Greqisë, ka bërë të ditur Zyra për media e Kryeministrisë të martën.
Gjatë qëndrimit atje, ai do të zhvillojë takime zyrtare me përfaqësues të ndryshëm.
Kjo tryezë, e 26-ta me radhë, organizohet nga Qeveria e Greqisë dhe prestigjiozja britanike “The Economist” me mbështetjen e Parlamentit Evropian dhe Komisionit Evropian.
Me temën “Antiteza, transformime, arritje në një botë në ndryshim”, në këtë tryezë do të marrin pjesë liderë shtetesh, ministra, drejtues të organizatave ndërkombëtare, drejtues biznesi e profesionistë nga akademia dhe mediat.
Sipas njoftimit, Kurti të martën merr pjesë në panelin me temën “Evropa juglindore: A mund të ketë stabilitet dhe prosperitet në rajon?”.
Pos kryeministrit Kurti, të ftuar në panel janë edhe Dritan Abazoviq, kryeministër i Malit të Zi, Zoran Zaev, ish-kryeministër i Maqedonisë së Veriut, Sir Stuart Peach, i dërguari special i Mbretërisë së Bashkuar për Ballkanin Perëndimor dhe George Katrougkalos, ish-ministër i Punëve të Jashtme të Greqisë. /ksp
