Kryeministri Albin Kurti ka përmendur të dielën investimet për ushtrinë në dy vjet e gjysmë qeverisje.
Kurti nëpërmjet një postimi në Facebook ka thënë se buxheti i ushtrisë është dyfishuar, e investimet në armatim janë rritur për 191 për qind.
“Ministrisë së Mbrojtës iu ndanë 100 milionë euro buxhet për herë të parë në vitin 2021. Prej atëherë, minimumi është aq, kurse tavani sa vjen e ngrihet. Për vitin 2023, buxheti për ushtrinë është 141 milionë euro, më shumë se dyfishim krahasuar me kohën kur morëm në drejtim qeverinë”, ka shkruar Kurti.
Sipas tij, me rekrutimin e 1,852 ushtarëve të rinj, numri i përgjithshëm i ushtarëve është rritur për më shumë se 2/3.
“3325 ushtarakë kanë përfunduar trajnime profesionale jashtë vendit. Ata janë të pajisur më mirë se asnjëherë më parë, sepse investimet në armatim janë rritur për 191%. Arsenalit tonë ushtarak, ia shtuam dronët e mirënjohur luftarak Bayraktar”, ka shtuar Kurti.
Përmes marrëveshjeve të nënshkruara të bashkëpunimit me Mbretërinë e Bashkuar, Shqipërinë, Letoninë, Malin e Zi, Maqedoninë e Veriut dhe Kroacinë, Kurti ka thënë se Kosova ka thelluar edhe më tej raportet me partnerët strategjikë.
“E në Defender Europe 21 dhe 23 u rreshtuam krah për krah me aleatët tanë në ndërmarrjen më të madhe të ushtrimeve ushtarake në kontinentin e Evropës që prej përfundimit të Luftës së Dytë Botërore. Me Forcën e Sigurisë, të sigurt në mbrojtje të Republikës”, ka përfunduar ai.
