Kryeministri i Kosovës, Albin Kurti tha se, mesa duket, prokurori serb i ka hedhur poshtë akuzat për terrorizëm kundër tre policëve të arrestuar të Kosovës, ndërsa i ka mbajtur në fuqi vetëm akuzat për posedim të paligjshëm të armëve.
Kurti i bëri komentet gjatë një adresimi në Forumin e Prespës në Strugë, por nuk dha detaje të tjera.
Më herët, Radio Evropa e Lirë konfirmoi se tre policët, të arrestuar nga forcat serbe më 14 qershor, po merren në pyetje në Prokurorinë e Lartë Publike në Kralevë – qytet në jug të Serbisë.
Por, Prokuroria e Kralevës nuk iu përgjigj pyetjeve të REL-it se çfarë akuzash rëndojnë mbi ta.
Qeveria e Kosovës e konsideron arrestimin e tyre si “rrëmbim” në territorin e saj.
Serbia e mohon këtë, duke thënë se ata janë arrestuar në territorin e saj.
Autoritetet në Serbi duhet të vendosin gjatë së premtes për trajtimin e mëtjemë të rastit të tre policëve, pasi kanë kaluar 48 orë nga arrestimi i tyre.
Ky është afati ligjor brenda të cilit Prokuroria duhet të vendosë nëse do të propozojë masë paraburgimi dhe, më pas, gjyqtari ta marrë vendimin.
Nëse nuk merret masa e paraburgimit, policët e arrestuar duhet të lirohen.
Shtetet e Bashkuara të Amerikës dhe Mbretëria e Bashkuar bënë thirrje për lirimin e menjëhershëm të tyre./REL
*Ky lajm është duke u përditësuar.
