Fansat e Bella Hadid janë shprehur të shqetësuar pasi supermodelja u duk e lodhur dhe e pasigurt gjatë ecjes në pasarelën e sfilatës së Victoria’s Secret 2025.
Një video virale në TikTok e tregon Hadid, e veshur me një palë krahë 22 kilogramësh, teksa përpiqet të ruajë ekuilibrin dhe ritmin në skenë.
Përdorues të rrjeteve sociale vunë re se ajo dukej e tendosur dhe e pafuqishme, me disa që komentuan se ajo “dukej sikur do të binte në fund të pasarelës”, shkruan DailyMail.
Të tjerë u shprehën të zhgënjyer që asaj iu dhanë rekuizita kaq të rëndë, duke marrë parasysh shëndetin e saj delikat.
Paraqitja e Hadid vjen vetëm pak javë pas kthimit të saj nga Gjermania, ku u trajtua për sëmundjen kronike Lyme.
Modelja 29-vjeçare ka qenë e hapur në rrjetet sociale për gjendjen e saj shëndetësore dhe për betejat me depresionin dhe ankthin.
Ndonëse shfaqja e saj në pasarelë u vlerësua për përkushtimin dhe profesionalizmin, shumë prej fansave besojnë se ajo ende nuk është plotësisht e rikuperuar dhe duhet të fokusohet tek shëndeti para çdo angazhimi tjetër.
