Kryetari i Komunës së Dollnenit, Blerim Islami, ka njoftuar fillimin e punimeve për ndërtimin e rrugës që do të lidhë dy anët e fshatit Cërnilishtë, një projekt i shumëpritur nga banorët e kësaj zone.
Sipas Kryetarit Islami, ky projekt infrastrukturor përfaqëson një hap të rëndësishëm drejt përmirësimit të qarkullimit dhe lehtësimit të jetës së përditshme për banorët e fshatit. Ndërtimi i kësaj rruge pritet të ndikojë drejtpërdrejt në lidhjen më të mirë të pjesëve të fshatit dhe në zhvillimin e mëtejshëm të komunitetit lokal.
“Ëndrra e banorëve të Cërnilishtës po bëhet realitet. Me fillimin e ndërtimit të kësaj rruge po krijojmë kushte më të mira për qarkullim dhe për zhvillimin e fshatit tonë. Ky nuk është vetëm një investim në infrastrukturë, por edhe një hap drejt lidhjes më të fortë të komunitetit”, ka deklaruar Kryetari i Komunës së Dollnenit, Blerim Islami.
Ai theksoi se komuna do të vazhdojë të investojë në projekte që përmirësojnë jetën e qytetarëve dhe zhvillimin e fshatrave, duke punuar çdo ditë që banorët të kenë kushte më të mira jetese.
Në kuadër të projekteve zhvillimore, Komuna e Dollnenit ka paralajmëruar se do të vazhdojë realizimin e investimeve infrastrukturore edhe në vendbanime të tjera të komunës.
