Komisioni Qendror i Zgjedhjeve ka ndryshuar katër rregullore, me qëllimin për të evituar parregullsitë që kanë përcjellë procesin zgjedhor të 28 dhjetorit. Ndryshimet parashohin auditim të procesit të numërimit, filtra për vëzhguesit dhe vënie pragu për numrin minimal të votuesve në seli diplomatike
Komisioni Qendror i Zgjedhjeve ka paraparë mekanizëm të ri kontrolli gjatë numërimit të votave për zgjedhjet e 7 qershorit, me synim parandalimin e manipulimeve që janë evidentuar në procesin e para gjashtë muajve.
Zëdhënësi i KQZ-së, Valmir Elezi, ka thënë se është ndryshuar Rregullorja Zgjedhore për Qendrën e Numërimit dhe Rezultateve, së cilës i është shtuar një dispozitë e re.
“Konkretisht, është paraparë që pas pranimit të materialeve zgjedhore nga vendvotimet e rregullta në Qendrën e Numërimit dhe Rezultateve, KQZ-ja vlerëson situatën dhe sipas nevojës mund të vendosë rinumërimin e votave deri në 10% të vendvotimeve të përzgjedhura në mënyrë të rastësishme”, ka thënë Elezi.
Ndonëse dita e zgjedhjeve të 28 dhjetorit ka kaluar me pak parregullsi, procesi i numërimit të votave të kandidatëve për deputetë është shoqëruar me manipulime në shkallë të gjerë.
Sipas një raporti të Demokracisë në Veprim, rinumërimi gjeti se mbi 242 mijë vota u tjetërsuan gjatë numërimit fillestar. Kjo çoi në arrestimin e qindra komisionerëve dhe vëzhguesve të zgjedhjeve.
KQZ-ja nuk ka ndryshuar edhe rregulloren që përcakton kriteret për angazhimin e komisionerëve. Ajo nuk lejon të angazhohen persona që janë dënuar me vendim të formës së prerë në tre vjetët e fundit, por nuk ua mohon përfshirjen në proces personave që janë nën hetime.
Në KQZ kanë thënë se çështja e përzgjedhjes së komisionerëve do të trajtohet me kujdes.
E, të mërkurën, ky institucion ka miratuar Rregulloren e re për vëzhguesit e zgjedhjeve, e cila parasheh ndalimin e certifikimit për personat që kanë probleme me ligjin.
“Personat të cilët janë të dënuar ose janë në procedurë hetimore për shkeljet zgjedhore, nuk mund të përfshihen si vëzhgues në listën e vëzhguesve të subjektit politik të certifikuar”, thuhet në nenin 4 të Rregullores për vëzhgues të zgjedhjeve.
Po ashtu, rregullorja e re obligon kryetarët e partive politike, ose personat përgjegjës, që të dorëzojnë në KQZ deklaratë me shkrim, përmes së cilës zotohen se vëzhguesit e tyre do t’u përmbahen ligjeve dhe rregullave zgjedhore.
Komisionerët merren direkt me numërimin e votave, ndërsa vëzhguesit vetëm monitorojnë procesin.
KQZ-ja ka ndryshuar edhe Rregulloren për Regjistrimin dhe Votimin Jashtë Kosovës dhe me normat e reja është përcaktuar që, nëse në një qendër votimi në ambasadë apo konsullatë regjistrohen më pak se 50 votues, aty nuk do të zhvillohet votimi fizik. Në këtë rast, votuesit kalojnë automatikisht në votim përmes postës dhe njoftohen nga institucionet përkatëse.
Zgjedhjet e 7 qershorit do të jenë të tretat parlamentare brenda një viti e gjysmë.
