Kryeministri Dimitar Kovaçevski, me ftesë të Kolegjit Universitar Amerikan, ku ishte udhëheqës i marketingut në Fakultetin e Ekonomisë së Biznesit dhe Shkencave Organizative, para marrjes së postit të kryeministrit të Republikës së Maqedonisë së Veriut, mbajti një ligjëratë nderi me temën “Analiza e Përfitimeve Ekonomike dhe efektet e anëtarësimit në Bashkimin Evropian”, me rastin e 9 Majit – Ditës së Evropës.
Në ligjëratën e tij para studentëve, kryeministri Kovaçevski theksoi se edhe pse fillimi i negociatave ndërmjet Maqedonisë së Veriut dhe BE-së është shtyrë pas vendimit të Brukselit më 20 mars 2020 për mbajtjen e Konferencës Ndërqeveritare për fillimin e procesit të anëtarësimit në BE, ajo ende mbetet një detyrë prioritare për të gjithë ekipin e qeverisë.
“Maqedonia e Veriut edhe në këto kushte të pengesave në tre vitet e fundit po bën progres intensiv në fushën e integrimeve evropiane dhe ka ardhur koha për ta verifikuar këtë.
Ne e dimë se shpejtësia e përparimit tonë do të varet nga dinamika e reformave, gjegjësisht shpejtësia dhe shkalla në të cilën shoqëria në tërësi do të përfshihet në ato procese dhe do të reformohet”, theksoi Kovaçevski.
