Këshilli Gjyqësor i Maqedonisë së Veriut ka formuar një grup pune për të shqyrtuar vendimin e Gjykatës Themelore të Manastirit, e cila e liroi nga paraburgimi biznesmenin Borçe Markovski, pronar i kompanisë “Markovski Kompani”, në këmbim të një garancie prej 4.9 milionë eurosh.
Grupi i punës do të vlerësojë nëse gjykata ka vepruar në përputhje me ligjin për Markovskin që është edhe konsull nderi i Bjellorusisë në Maqedoni, pas reagimeve të shumta publike dhe mediatike. Vendimi për hetim u miratua me 11 vota në Këshillin Gjyqësor.
Markovski është një nga tetë personat e akuzuar për keqpërdorime në një tender publik në sektorin energjetik (REK Manastir), me vlerë 1.7 milionë euro. Hetimet përfshijnë ngrirjen e pasurive të tij në Maqedoninë e Veriut dhe Serbi.
